DBH publikoa iritsi da Pasaiara
Gaur jaso du albistea Karmengo Ama ikastetxeak, eta poz handiz ari dira ospatzen eskolan
Azkenean iritsi da hainbeste urtetan itxaron zen albistea. Trintxerpeko Karmengo Ama eskola, Ikastetxe Publiko Integrala (IPI) izango da 2016/17 ikasturtean. Gaur jaso dute albistea eskolan, eta dekretua otsailera arte argiratuko ez duten arren, albistea jada ofiziala dela baieztatu du Begoña Canal ikasketa buruak.
Hezkuntzako lurralde ordezkaritzatik jaso dute albistea, gaur bertan, erabakiaren berri eman eta egin behar dituzten hurrengo urratsak azaltzeko. Poz handiz hartu dute albistea eskolan, lorpena azken 20 urtetan egindako lanaren emaitza delako. “Ametsa egi bihurtu da” esan dute eskolako arduradunek, eta “ametsa egi bihurtzen lagundu duten guztiei eskerrak” luzatu dizkiete. Amaia Agirregabiriaren laguntza eskertu dute bereziki, “erakunde ofizialekin bilerak erraztu eta horietara laguntzeagatik”.
Bi ikasturte barru martxan
Eskolak jakinarazi duenez, gaur hitzartu duten akordioarekin, Hezkuntzako Gipuzkoako Lurralde Ordezkaritzak Karmengo Ama ikastetxean DBHko ziklo guztiak era mailakatuan ezartzeko konpromisoa bere egin du.
Eskolan DBH ezarri ahal izateko egokitze lanak egingo dituztela iragarri dute, baina lanek ez dutela eskolaren ohiko jarduna oztopatuko argituz, orain erabiltzen ez dituzten espazioak egokitu, eta gutxien erabiltzen diren guneak berrantolatuko dituztelako.
2016/17 ikasturtean hasiko dira DBHko Lehen Maila eskaintzen, eta hortik aurrera osatzen joango da zikloa, ikasturtez ikasturte, ikasleak 16 urte bete arte.
