EH Bildu: "Entzun dugu pasaitarren hitza"

Herritarrak beren jardueraren erdigunean kokatzen ez dutela asmatu esan du koalizioak; Garai berri bati ekingo diotela iragarri dute, udalean zein herrian, eta zabaldu duten hausnarketa prozesura biltzeko deia egin dute.

olatz mitxelena

Pasaia

2015/06/12

Pasaiako EH Bilduk lantaldea berritu du

Pasaian EH Bildu gobernutik oposiziora igaroko da hurrengo legegintzaldian. Koalizioak atzo jakinarazi zuenez, Migel Mari Torreak, Mikel Gartziak, Haritz Perezek eta Oihane Oronozek osatuko dute oposizioan lan egingo duen taldea. Perezek eta Oronozek hartuko dute, honenbestez, zerrendaren arabera Maider Ziganda eta Iurgi Aldalurri zegokien tokia. «Oposizio trinkoa eta garbia» egingo dutela iragarri du EH Bilduk, «alderdikeriazko jokoen gainetik Pasaiaren eta pasaitarron interesak defendatuz». Autokritika «Entzun dugu pasaitarren hitza», esan zuten koalizioko kideek atzo emandako prentsaurrekoan, eta ondorio bat jada atera dutela jakinarazi zuten: «Ez dugu asmatu herritarrak gure jardueraren erdigunean kokatzen». Hitz egiteko eta hausnartzeko asko dutela esan zuten EH Bilduko kideek eta horretan hasiak direla jakinarazi. Lehengo larunbatean egin zuten hausnarketa prozesu horren barruko lehen batzarra San Pedron, eta aurrerantzean bilera gehiago egingo dituztela iragarri dute, haietan parte hartzeko deia zabalduz: «Herritarrok bakarrik eraiki dezakegu EH Bildu herritar bat». Hurrengo batzarra hilaren 20an izango da, Antxoko kultur etxean. Ekarpenetarako posta elektronikoa erabiltzeko aukera zabaldu dute, baita sare sozialen bidea, koalizioaren twitter eta facebook kontuak erabilita. Lantalde berria Lantaldea berritu du Pasaiako EH Bilduk, eta bi helburu zehatzekin ekin diote lanari: « EH Bilduko Herri Proiektua osatzeko prozedura bat proposatzea eta herritarron partaidetza zein erabaki ahalmena indartuko duen antolaketa eredu bat proposatzea». Udazkenean hautatuko ditu arduradun berriak koalizioak, eta bien bitartean, atzo publikoki aurkeztu zuten taldeak hartuko du EH Bilduren ordezkaritza Pasaian–argazkian ageri dena-, beti ere batzarraren aginduetara.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.