Joste Eguna antolatu dute iganderako Trintxerpen
Antxon, bihar, salmenta postua jarriko du Gure Zumardian Gure Esku Dago-k, eguerdian
Bederatzi egun baino ez dira falta Anoeta estadioa jendez lepo bete nahi duen ekitaldirako, eta herrietan, lantaldeak azken minuturaino dabiltza jendea saretzen, eta elastikoak zein sarrerak saltzen.
Trintxerpen igande honetan egingo dute Joste Eguna. Serafin Esnaola plazan bilduko dira Trintxerpe eta San Pedrokoek beren oihal zatiak jostera, baina aldez aurretik, edota ondoren beren oihala eskuratu nahi duenak ondorengo tokietan eskura dezake: Lema eta Sonesa saltokietan eta Erdibana, Trintxer, Dax, Antxeta, Begihaundi eta Juanito tabernetan.
Antxon, oihalak josiak dituzte jada, baina lantaldeak Anoetarako sarrerak saltzeari ekin dio orain, eta horretarako, bihar, 12:00etatik 13:00etara salmenta postua jarriko dute zumardian. Edonola ere, Antxoko Gure Esku Dago-k jakinarazi du Leunda Tabernan, Urdin liburutegian eta Patxi Estankoan ere jarri dituztela salgai. 10 euro balio dute helduen sarrerek, eta 5 euro haurrenak. Bi urtetik beherakoek ez dute ordaindu beharrik, baina sarrera eskuratu behar zaie berdin-berdin.
Erabakitzeko eskubidea aldarri, Euskal Herriko hiriburu guztietan ekitaldi masiboak antolatuak ditu Gure Esku Dago-k hilaren 21erako. Donostian egun osoko egitaraua antolatu dute, eguerditik hasita, iluntzeraino. Ekitaldi nagusia, 17:30ean hasiko da Anoetan, baina aurretik guneka antolatu dituzte jarduerak. Txikienentzako jarduerak, esaterako, Illunben izango dira, eta gazte gunea, berriz, miniestadioaren bueltan. Han, besteak beste kontzertu maratoia antolatua dute, 11:30etik hasi eta gauerdiraino. 
