LABek hondakinen bilketan ari diren langileen lanpostuei eusteko eskatu du

Hondakinen bilketa udaletxearen menpeko zerbitzua izan dadila eskatu du sindikatu abertzaleak, "egiten den sistemarekin egiten dela".

olatz mitxelena

Pasaia

2015/06/12

Sistema berriaren lehen hondakin bilketa

Batzarrera deitu ditu gaur goizerako LABek Pasaiako udaletxeko langileak, 12:00etarako, hondakinen bilketan ari diren langileen egoeraz eztabaidatzeko. Jakina denez, elkarretaratzea deitu dute biharko atez atekoan lanean ari diren langileek, “beren lanpostuen defentsan eta pribatizazioren kontra”. Izan ere, PSE-EEk Pasaiako hauteskundeak irabazi ondoren kaleratuak izateko beldur dira langileak. PSE-EEk iragarria du Pasaian hondakinak atez ate biltzeko sistema bertan behera utziko duela, eta hori dela eta, LABek langileen kezka bere egin eta “hondakinen bilketan ari diren langileen lanpostuen etorkizunagatik ardura agertu du”. “Erabat mediatikoa den egoera honetan” udal arduradunek langileekin harremanetan jarri ez izana deitoratu du sindikatu abertzaleak. Gauzak honela, LABek publikoki agertu nahi izan du langile hauen lanpostuei eusteko eskatuko duela, “langabezian gelditu ez daitezen irtenbideak eskatuz”. Era berean, sektore publikoaren edozein pribatizazioaren kontra egingo dutela iragarri dute, eta horregatik, hondakinen bilketa aurrerantzean ere udaletxeko menpeko zerbitzua izan dadila eskatuko dutela, “bilketa egiten den sistemarekin egiten dela”. Azkenik, zerbitzuen pribatizazioaren aurka sortzen diren mobilizazioak babestuko dituztela iragarri dute, eta honenbestez, langileek bihar 09:30etik aurrean Arizabalo parean egingo duten elkarretaratzera biltzeko deia egin dute. LAB sindikatuaren adierazpena. euskaraz

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.