Hondakinen bilketan ari diren langileek beren lanpostuen defentsa egin dute, eta alkate izendatu berriari beren eskaeren berri eman diote
Izaskun Gomez, kargua hartu berritan, legegintzaldiko lehen diskurtsoa egiten
Errauste plantaren kontrako oihuak batetik, eta txaloak eta poza bestetik. Denetik izan da gaur goizean Arizabalon, udalbatza berria izendatzeko egin den plenoan, baita euskararen aldeko aldarriak ere, gaztelania hutsez egin baitu alkatea izendatu berriak lehen diskurtsoa.
10:00etan puntuan hasi da udalbatzarra, eta ordurako lepo zegoen aretoa. Zinegotzi eta alkate berriaz gain, hain ziren ordu erdi lehenagotik udaletxe sarreran
beren lanpostuen defentsan elkarretaratzean izan diren langileak, eta baita haiei babesa agertzera joan direnak ere; plenoan izan dira ere PSE-EEren jarraitzaileak, alderdiko goi kargudunak tarteko; Iñaki Arriola eta Denis Itxaso izan dira Pasaian, Izaskun Gomezi babesa agertzen.
Ezusterik ez
Ezusterik ez da izan Pasaiako udalbatzarrean. Adinaren arabera mahaia osatu eta zinegotziek zin egin dute kargua, “legeak hala behartuta” EAJkoak eta EH Bildurenak, baita Pasaiak Ahal Du taldeko hiru zinegotzietatik batek, eta bere horretan gainontzekoek.
PSE-EEko Izaskun Gomezek eta EH Bilduko Migel Mari Torreak aurkeztu dituzte beren hautagaitzak, baina ez batek ez besteak, ez dute gainontzeko alderdien babesik lortu, eta honenbestez, hauteskundeetan indar bozkatuena izan den zerrendaburua -Izaskun Gomez Cerdeño- izendatu dute alkate.
Herritarren konfiantza eskertu
Pasaitarrek beregan jarritako konfiantza eskertuz hasi du inbestidurako diskurtsoa Izaskun Gomezek. Pasaia kudeatzea ez dela erreza esan du alkate berriak, baina herriak etorkizuna baduela eta etorkizun hori eraikitzera bere indar guztiak bideratuko dituela esan du antxotarrak.
Lehendik ere karguan esperientzia baduela gogoratu eta orduko esperientzia hartatik abiatuko dela esan du Gomezek, eta alkatetza behar duenarentzat zabalik izango dela jakinarazi.
Kargu hartu duten zinegotziak zoriondu ditu eta ongi etorria eman die karguan gaur estreinatu direnei.
Datozen egunetan bere gobernua aurkeztuko duela iragarri du, eta baita programa ere. Edonola ere, gainontzeko taldeetako bozeramaileen iritzia bildu eta “asko entzuteko” asmoa duela esan du. “Elkarrizketa, akordioa eta kontsentsua” bere “gobernuaren iparrorratza” izango direla esan du Gomezek.
[nggallery id=74]
