Legegintzaldi berriaren makila hartuta

Osatu dute 2015-2019ko legegintzaldiko udal berria, Jexux Leonet EH Bilduko hautetsia alkate izango duena.

eihartze aramendia

2015/06/13

Jexux Leonet alkatea aginte makila eskuan Aiora Perez de San Roman alkate ohiarekin

Osatu dute 2015-2019ko legegintzaldiko udal berria, Jexux Leonet EH Bilduko hautetsia alkate izango duena. 12:00ak puntuan zirenean hasi da karguak hartzeko plenoa, udaletxeko areto nagusia lepo zegoela. Adineko mahaia izendatzea izan da lehen eginbeharra, Agurtzane Lekuona hautetsi gazteenak eta Juan Inazio Ansa zaharrenak osatu dute. Aukeratutako hautetsien izen-abizenak berretsi eta gero zinegotziek euren kargua hartu dute ofizialki, horrela bigarren eginbeharra betez. EAJko Segundo Garin eta Rafael Bergaretxe ez dira egon eta hurrengo udalbatzarrean hartuko dute kargua. Alkatea aukeratzea izan da plenoaren hirugarren eginbeharra. Horretarako, zinegotziek euren bozka eman dute eta EH Bilduren 9 botoekin, Jexux Leonet Elizegi aukeratu dute alkate. Aiora Perez de San Roman alkate ohiak eman dio aginte makila. Alkate berriaren lehen hitzak argiak izan dira: “Lanerako prest gaude, zuen babesa gure konpromisoa da”. Eusko Alderdi Jeltzaleak bozka asko jaso dituela aipatu du Leonetek eta bide horretatik proiektu bateragarriak dituztela nabarmendu du. Hala, elkarlanaren aldeko apustua egin du. Gure Esku Dagoren ekainaren 21eko ekitaldiari ere egin dio erreferentzia eta herritar bezala bertaratuko direla azaldu du. Oiartzun orekatu eta juxtua eraiki nahi dutela nabarmendu du eta orain herritarren konfiantza irabaztea izango dela asmoa. Aholkuak Zigor Goikoetxea zinegotzi ohiak joan den legegintzaldiko Gobernu Taldearen izenean hitza hartu du eta eskerrak eman ditu urte hauetako guztiagatik. Aholkuak ere eman dizkie zinegotzi berriei: “Lehenengo aholkua: entzun, entzun, entzun. Zaindu zuen taldea, egun gogorrak etorriko dira eta, baina asko ikasiko duzue”. Animo hitzak izan ditu beraientzat. Iñaki Arbelaitz EAJko zinegotziak hartu du hitza gero. Zoriondu egin du lehenik eta behin gobernu talde berria eta eskerrak eman dizkie herritarrei eurei babesa emateagatik. [nggallery id=75]

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.