Andoainen lehen aurkezpena egin eta gero, Gabiltza proiektua Oiartzuna iritsi da. Atzo ilunabarrean eman zuten horren berri Gabiltzaren egile Oihana Etxebarrietak eta Eider Olazarrek kiroldegiko bilera gelan.
Oihana Etxebarrieta eta Eider Olazar
Andoainen lehen aurkezpena egin eta gero, Gabiltza proiektua Oiartzuna iritsi da. Atzo ilunabarrean eman zuten horren berri Gabiltzaren egile Oihana Etxebarrietak eta Eider Olazarrek kiroldegiko bilera gelan. Emakumez osatutako datu basea da aurkeztu dutena, momentuz 115 emakumek osatzen dutena (horietatik 113 euskal hiztunak); dena den, ez dago itxita datu base hori, inondik inora ere, asmoa elikatzen eta “bizia ematen” segitzea baita. BERRIA Fundazioaren bekarekin atera dute aurrera proiektua.
Komunikabideei eta eragileei zuzendutako tresna da, emakumeak presentzia gehiago izan dezan halakoetan. Datu basea Interneten dago,
Gabiltza.eus atarian. Bertan hainbat atal daude: besteak beste, aditu eta arituen kontaktuak, albisteentzako txokoa eta dokumentazio esparrua jasoko ditu. Generoari buruz plazaratutako txostenak, eztabaidak eta hizkera sexistak saihesteko gidak ere jarriko dituzte eskuragarri, nahi duen orok noiznahi kontsulta ditzan.
Agenda atalean, berriz, komunikazio parekidearekin lotutako informazioa bilduko dute.
Sare sozial moduko bat
Sare sozialetatik zerbait ere badu datu baseak; izan ere, erabiltzaile bakoitzak kudeatzen du bere perfila. “Inor ez dago behartua hemen egotera betiko, egunen batean baja eman nahi badu ez dago arazorik. Zertan den aditua ere norberak erabakiko du, aldatzeko aukera ere badago”, azaldu zuen Etxebarrietak. Proiektua mugimendu feministatik sortu bada ere, perfila egiteko feminista ez dela izan beharrik nabarmendu zuen, bestalde, Olazarrek.
Emakumeei, hortaz, perfila osatzera animatu dituzte, “denok baikara zerbaitetan aditu edota aritu; ez da zertan goi mailako titulurik behar zerbaitetan aditu izateko”.
Oihana Etxebarrietari egindako elkarrizketa proiektuari buruz:
“Emakumeez hitz egiten da, baina emakumeek ez dute hitz egiten”.
