EH Bilduk gezurretan aritzea leporatu dio Izaskun Gomezi

Alkate berriak kale garbiketa eta hondakin bilketaren harira publikoki esandakoak erantzun eta gezurtatu ditu koalizio abertzaleak

olatz mitxelena

Pasaia

2015/06/19

Izaskun Gomez, kargua hartu berritan, legegintzaldiko lehen diskurtsoa egiten

Izaskun gaizki hasi da izenburupean, Pasaiako EH Bilduk prentsa oharra zabaldu du aste honetan zehar alkateak egin dituen adierazpenak erantzuteko. Gezurretan aritzea leporatu dio koalizio abertzaleak alkate berriari eta besteak beste, kale garbiketaren zerbitzua pribatizatuta, udalak FCCri azken urtetan “zerbitzuak balio zuena baino 21.000 euro gehiago ordaindu” ekarri dute gogora. Bide beretik, EH Bilduk pribatizatuta zegoen zerbitzu bat publiko bihurtzeko hartutako erabakia txalotu eta aurretik kale garbiketan ari ziren ia langile guztiek lanean jarraitzen dutela nabarmendu dute. Zehaztu dutenez, bik ez zuten lan poltsarako azterketa gainditu, eta hirugarren bat ez zen aurkeztu. Hondakin bilketaren harira, alkatearen asmoak Denis Itxasoren bitartez ezagutu izana deitoratu du EH Bilduk, eta gezurtatu dute mankomunitatean oztopoak jarri izana: “Berriz ere gezurra, Bilduk ez duelako gehiengorik San Markon”. Uztailaren 1erako edukiontziak jartzen hasiko zirela iragarri zuen Itxasok hauteskundeen ondoren, eta iragarpena egin eta gutxira atzera egin zuen, EH Bilduk bidean ezarritako oztopoak argudiatuta. “Gomezi gogorarazi nahi diogu udalbatzarreko akordio bat badagoela, birziklatze-tasaren helburua %70ekoa izatea zehazten duena”, esan du EH Bilduk eta “langa hori gaindituko duen edozein sistemari buruz hitz egiteko eta adostasunetara iristeko” prestutasuna agertu dute.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.