Pelukak jantzita bilduko dira sanpedrotarrak gaurko txupinazoan
Gaur hasi eta asteartera arte sanpedroetan festa nagusi
Festak badiaren alde batetik bestera jauzi egin du. Sanpedroak hasiko dira gaur arratsaldean, sanjoanei lekukoa hartuta. Mari Karmen Urdanbidek botako du aurten jaiei hasiera emango dien suziria, 20:00etan. Ordurako alkateordetza azpian bilduta izango dira sanpedrotarrak. Jai hasiera koloretsua izatea espero da, pelukak jantzita joateko deia egina baitu jai batzordeak.
Aurretik, baina, haurrentzako jarduerak izango dira. 18:30ean irtengo da txikien danborrada, Kalparran Blas de Lezori harrera egingo dioten ordu berean. Aurretik, aldiz, haurrentzako askaria eta buruhandi eta erraldoiak izango dira. Gaua, berriz, danborradak eta Emaiok elektrotxarangak girotuko dute.
Kintoen Eguna
Aurtengo egitarauan berritasuna, biharko antolatutako Kintoen Eguna da. Aurrerantzean kanpoan zein herrian bizi direnak elkartzeko eguna izan dadin nahi du jai batzordeak, eta asmo horrekin antolatu dute herri bazkaria, adin guztietako sanpedrotarrak mahaiaren bueltan elkar daitezen. Bazkarira txartelak Begi Haundi tabernan eros daitezke 10 euroren truke.
Etzi, puntako pilotariak
Etzirako, baina, indarrak gordetzea komeni, eguerdian helduen iñude eta artzainen konpartsa irtengo baita Torreatze aldera. Desfilea Ondartxora iristean, berriz, Albaolako kideek Lafayette iola uretaratuko dute. XVIII. mendeko iola frantses baten erreplika da uretaratuko dutena, mundu osoko ontzigintza-ikasle eta boluntarioek Albaola Itsas Kultur Faktorian eraikitakoa.
Artzainen eta Inudeen desfilea bukatzerakoan, baina, sanpedroetako beste klasikoa ospatuko dute. Gay eta lesbianen ikurrina igoko dute alkateordetzako balkoian. Lesbiana, Gay, Transexual eta Bisexualen Harrotasunaren Nazioarteko Egunarekin bat egiten dute urtero sanpedroek, eta ospakizunari keinu egiten zaio beti San Pedron.
Arratsaldean berriz, pilotak hartuko du protagonismoa. Herriko eskupilota finala jokatu ondoren, profesionalen txanda izango da. Saralegik eta Goñik, Olaizola I, eta Kokaren kontra jokatuko dute.
Astelehenarekin egokitu da aurten festetako egun handia eta honenbestez luze joko du asteburua San Pedron. Asteartean bukatuko dira jaiak, Haurren Eguna ospatuz.
Trafikoa eta aparkalekua
Bihar hasi eta jaiak bukatu arte Esnabideko biribilgunea itxiko dute ibilgailuentzat, 12:00etatik 15:00etara eta 17:30etik aurrera. Astelehen eta asteartean, berriz, ordubete aurreratuko dute ixteko ordua. Goizez 11.00etan itxiko dute. Jaietara autobusez joateko deia zabaldu du udalak.
Horrez gain, bihar, etzi eta etzidamu Nabarra Boua plazako aparkalekuko 3. solairua egokituko dutela iragarri dute, bertan bertakoek nahiz kanpokoek aparkatzeko aukera izan dezaten.
Egitaraua
Jai batzordearen oharra
Inude eta artzainak
