Uztailaren 1ean hasiko dira udaleku irekiak
Askotariko ekimenak egingo dituzte 3 eta 10 urte arteko haurrek udaleku irekietan.
Bost egun barru, datorren asteazkenean, hasiko dira Lezoko Udaleko Kultura departamentuak antolatzen dituen udaleku irekiak. Hilabetez, hamaika ekimenez gozatzeko aukera izango dute parte hartuko duten 3 eta 10 urte arteko 184 haurrek. Astelehenetik ostiralera, lau orduz ariko dira haurrak udalekuetan, 9:30etik 13:30era eta giro euskaldun eta tseginean jolasak, dantzak, kantak, antzerkia eta beste hainbat ekintza egiteko aukera izango dute Lezoko ohiturak ezagutzen dituzten bitartean.
Txangoak ere egingo dituzte haurrek, baita igerilekura irteerak ere eta bestelako sorpresak ere izango dituztela jakinarazi dute antolatzaileek.
Parte hartzeari erreparatu diote azkenik antolatzaileek, eta aurten matrikulazioa inoizko altuena izan dela nabarmendu dute. 184 haurrek eman dute izena eta hamabost taldeetan banatuta ariko dira uztailean zehar.
