Xabier Goienetxea aske uzteko eskatuz manifestazioa egingo dute arratsaldean
Frantziako poliziak atzo arratsean atxilotu zuen Goienetxea, ETAkoa izatea egotzita. Manifestazioa Herriko Plazatik irtengo da, 20:00etan.
Atxilotuen askatasuna eskatzeko pankarta
Elkarretaratzea CAFen
Goienetxeak Irungo CAFen egiten zuen lan, eta bere lankideek, LABek deituta, ordubeteko lan uztea egin dute 11:00etatik aurrera. Elkarretaratzea ere egin dute lantegiaren ate parean. “Goienek, Euskal Herri libre baten alde publikoki lan egiteagatik poliziaren jazarpena pairatu zuen, eta 2008an lantokia utzi behar izan zuen”, gogorarazi du sindikatuak. Espainiako zein Frantziako estatuek Euskal Herrian hasitako “aro berriari jaramonik egin gabe” jarraitzen dutela salatu dute, “atxiloketa politikoen bitartez errealitateari bizkarra emanez”. Horrela, CAFeko LABek uste du “guztiz ulertezina” dela atxiloketekin jarraitzea. “Konponbidearen aldeko gehiengoaren norabidearen kontra kontra kokatzen da jarrera hori”, gaineratu dute. Horrela, bi estatuetako gobernuei eskatu diete “sufrimendu gehigarriak” alde batera utzi, eta “erantzukizunarekin” jokatzen has daitezen. Horretarako, eskubide guztien errespetuan oinarritutako politika eta araudien ezarpena, eta elkarrizketa eskatu diete. “Beste guztia denbora galtzeko eta sufrimendua alferrik areagotzeko trikimailua antzuak baino ez dira”, esan du sindikatuak. Egingo diren mobilizazioetan parte hartzera deitu du.
