Eraso sexisten gaineko protokoloa banatuko dute jai guneetan. Gainera, kale saltzaileei euskarazko hitzak dituen hiztegi txiki bat ere emango die udalak.
Garazi Lopez de Etxezarreta, bi kanpainak aurkezten
Errenteriako Udalak, madalenei begira, bi kanpainan jarriko ditu martxan. Alde batetik, berdintasunerako azpisailak errespetuan oinarritutako erlazioak sustatuko ditu, eta erasorik balego, horretarako protokoloaren berri emango dute Bestalde, saltzaile ibiltariei euskarazko hiztegi txiki bat emango diete, Hizkuntza departamendutik.
Bi arloetako zinegotzi ordezkari Garazi Lopez de Etxezarretak adierazi duenez, iaz bezala aurten ere martxan jarriko dute kanpaina. “Gaur egun, emakumeok, emakume izateagatik, aurre egin behar diogu gogaitu edo inbaditu nahi gaituzten pertsonei, baita jazarpen eta eraso egoerei ere”, esan du. Horregatik, taberna, txosna, elkarte gastronomiko eta beste hainbat jai eremutan “errespetuzko eta tratu oneko harremanak bermatzeko” ekintzak egingo dituzte.
Toki horietan informazioa banatuko dute, balizko eraso sexista bati nola aurre egin jakinaraziz, baita sentsibilizatzeko ere. Hiru euskarritan joango da materiala: Eraso sexisten kontrako protokoloaren liburuxka, eta erasoei erantzuteko informazioa duten pegatinak zein txartelak. Guztira, 2.500 txartel eta 250 pegatina banatuko dituzte herriko 70 txokotan. Eraso bat gertatuz gero, Udaltzaingoarekin harremanetan jartzea gomendatu du zinegotziak. Gizarte zerbitzuekin eta berdintasun azpisailarekin zein Ertzaintzarekin egongo dira koordinatuta.
Euskara sustatu
Madalenetara begira atera duten beste kanpaina Egin Keinua da. Madalenetan etortzen diren 200 inguru kale saltzaileei zuzenduta dago. Merkataritzan erabiltzen dituzten 60 bat esapiderekin osatutako hiztegi txiki bat egin dute, baita euren postuan jar dezaketen txartel bat ere, kanpainaren leloarekin. “Helburua da”, esan du Lopez de Etxezarretak, “euskara sustatzea, jarrera proaktiboan. Euskarak harremanak egiteko aukera berriak ematen dituela ikustarazi nahi dugu, eta herritarrak ere joko horretan sartzea nahi genuke”.
