Errenteria-Orereta ez da inoiz hilko
Ereintza dantza taldeak Erromeria Eguna antolatu du hamazazpigarren aldiz. Larunbatean ospatuko dute, eta biharamunean, Errenteria Dantzan.
Erromeria Eguna aurkeztu dute gaur
Bazkaria eta erromeria
Mila Alberro antolatzaileetako batek esan duen bezala, “euskaldun on bezala”, jaiaz gain, egongo da jateko aukera. 14:30ean, izerdia botata, bazkaria egingo dute Orereta Ikastolak Koldo Mitxelena plazan duen egoitzaren arkupetan. Menua honakoa izango da: piper beteak, spaghettiak tomate eta txistorrarekin, oilasko izterrak saltsan barazkiekin, postrea, kafea eta edaria. Txartelak erosteko informazio gehiago, hemen. 18:00etan Gamon Zumardira itzuliko dira, eta han erromeria hasiko da, Jon Maiaren bertsoen ondoren. Juan Mari Beltran eta Aiko taldea ariko dira bertan, eta kontzertu didaktikoa emango dute. Dantzarik ez egiteko aitzakiarik ez da egongo, beraz. Udaleko Kultura Saileko teknikari Juncal Mintegiak esan duenez, “ekitaldiak berak duen garrantziaz gain, madalenen aurreko asteburuan lotura egiten du. Ereintzak ekarpen handia egiten dio herriari”.Errenteria Dantzan
Larunbatekoarekin nahikoa ez duenak, igandean dantza gehiagorekin gozatzeko aukera izango du. Errenteria Dantzan ekitaldia egingo dute, eta antolatzaileez gain, Zelanda Berriko Nga Uri To Wai-o-Taiki eta Senegalgo Jammu ariko dira dantzan. 18:30ean zumarditik abiatuko dira, eta kalez kale ibiliko. Ordubete beranduago abiapuntura itzuli eta erakustaldiak egingo dituzte. Zelanda Berrikoek maoriak erakutsiko dituzte, eta senegaldarrek euren herrialdeko kultura eta dantza erakutsiko dituzte. Bakoitzak hogei minutuko saioa eskainiko dute.
