'Pintxopote laranja' egingo dute gaur, bihar dokumentala emango dute eta igandean manifestazioa egingo dute, Landare elkartea babesteko mozioaz gain.
Landare babesteko dinamika aurkeztu zuten atzo
Pasa den ekainaren 19an, Espainiako Auzitegi Gorenak
Herriko tabernen auzia deitutakoaren epaia berretsi zuen. Bertan 107 elkarte konfiskatzeko agindua eman zuen Espainiako Auzitegi Nazionalak. Tartean dago Errenteria-Oreretako Landare elkartea.
Atzo arratsaldean agerraldia egin zuten Landareko hainbat kidek. Gogorarazi zutenez, orain dela ia hamalau urte hasi zen Baltasar Garzon 35/02 sumarioa hasi zuela. Epaiketa duela bi urte hasi eta iaz bukatu zen.
Landare elkartearen ibilbideari errepasoa eman zioten atzo. “1983an, hamaika herritarrek ilusioz sortu zuten, gure herrian euskal kultura eta kirola sustatzeko, baita herrigintza aritzeko helburuz”. Gainera, elkarteak urteotan egin dituen ekintzen berri eman zuten, herriko beste hainbat eragilerekin elkarlanean. “Landare elkartea gure herriko kulturan erreferentzia nagusietako bat dela esan dezakegu”, adierazi zuten. Landarek urtero antolatzen dituen ekitaldiak zehaztu zituzten: pilota eskola, pilota partidak, aurresku txapelketak, bertso saioak, erraldoien eta buruhandien madalenetako desfilea, kontzertuak, hitzaldiak, garagardo festa eta madalenetako danborrada. Gainera, Errenteria-Oreretako beste hainbat talderekin elkarlanean aritzen dira, madalenetan, Sagardo Egunean, Dantzari Txiki Egunean eta beste.
Dinamika
Egoera horren aurrean, babesa eta elkartasuna eskatu dute Landareko kideek. Gaur arratsaldean
pintxopote laranja abiatuko dute Landaretik, eta bihar
Ziztadak dokumentala emitituko dute elkartean bertan, 22:30etik aurrera. Gainera, datorren igandean, hilaren 19an, manifestazioa egingo dute. Herriko Plazan jarri dute zita, 19:00etan. Datorren astelehenean bilduko da udalbatza, eta bertan Landare babesteko mozioa aztertuko dute. Azkenik, madalenak “laranjak” izatea eskatzen dute. Herriko auzo elkarte, kultura eragile eta beste hainbaten babesa jasotzen ari dira.
Landareko kideek jakinarazi dute euren kultura arloko lanarekin jarraituko dutela datozen egun, aste eta hilabeteetan: “Gure ondasunak kenduko dizkigute, baina inoiz ez helburua ilusioa eta gogoa”.