EAJ-ko hiru zinegotzik eta PSE-EE-ren bakarrak osatuko dute gobernu batzordea
Plenoen maiztasuna eta ordutegia mantentzea onartu zuen atzo udabatzak.
Ezohiko osoko bilkura egin zuen atzo udalbatzak, Kepa Garbizu alkatetzara heldu zenetik lehena. Bederatzi puntu zituen plenoak eta lehenenean eratu diren talde politiko eta horietako bozeramaileen kontu eman zuten. Kepa Garbizu izango da EAJren bozeramaile, Ainhoa Zabalo EH Bildurena, eta Jose Angel Sanchez PSE-EErena. Gobernu batzordea lau zinegotzik osatuko dute, EAJko Kepa Garbizuk, Noemi Arberasek eta Xubero Ubillosek eta PSE-EEko Jose Angel Sanchezek. Batzorde informatiboetan, berriz, hiruna ordezkari izango dituzte EAJk eta EH Bilduk, eta bat PSE-EEk.
Berritasunen artean, aldibereko itzulpen zerbitzua jarriko dutela zinegotzientzat zein bilkuretara biltzen den publikoari begira. Plenoen maiztasuna eta ordutegia mantenduko dela aurrerantzean ere aho batez onartu zuen udalbatzak: bi hilabetean behin egingo dituzte, hilabete bakoitzeko azken ostegunarekin, 19:30ean.
Aholkularia kontratatu
Gizarte Zerbitzuetarako zinegotzi delegatuaren dedikazio esklusiboa eta ordainketa onartzeko proposamena ere onartu zuen plenoak atzo. EAJko Noemi Arberas izango da arduraduna. EH Bilduren ustez badira lan karga gehiago duten arloak, hirigintza kasu, eta harridura azaldu zuen dedikazio esklusiboa gizarte zerbitzuetara bideratzearen gainean. Arberasek ez dakiela euskaraz nabarmendu zuen gainera Mikel Arruti EH Bilduko kideak: “Arlo horretan herritarrekin zein beste erakundeekin askotan euskaraz egitea tokatzen da, eta justu euskaraz ez dakien zinegotzia aukeratu duzue”.
Aholkulari lanpostua sortzea ere onartu zuen atzo udalbatzak. EH Bilduk abstentzioaren alde egin zuen puntu horretan. Zabaloren hitzetan, EH Bildu alkatetzara heldu zenean aurreko legegintzaldian berriak ziren taldekide guztiak, baina Garbizuk udaletxean urte asko daramala, eta alkatetzan ere izan dela nabarmendu zuen. Horren harira aholkulariak alkatea eta gobernu batzordea aholkatzeko egongo dela erantzun zuen Garbizuk. Plenoetara zein batzordetara joateagatik zinegotziek jasotzen duten diru saria %20 igotzea ere onartu zuten atzo.
