Txistularien Kontzertu Nagusiak festa gogoa (pixka bat) asetu du

Txistularien Kontzertu Nagusia egin zuten atzo. Txistulariekin batera, dantzariak, abeslariak eta musikariak ere izan ziren. Gaur ekitaldi gehiago daude

Erik Gartzia

Errenteria-Orereta

2015/07/21

Landarbaso abesbatza, kantuan

Atzo arratsean X. Txistularien Kontzertu Nagusia egin zuten Gamon Zumardian. 20:00etan hasi zen arren, ordu eta erdi —gutxienez— lehenagotik herritarrak posizioak hartzen hasi ziren. Udal Txistulari Bandako kideez gain, inguruko herrietako txistulariak ere izan ziren oholtza gainean, eta haiekin batera EMKEko musika bandako kideak izan ziren. Gainera, Ereintzako dantzariek, Xanti eta Maialen zein buruhandien konpartsa, eta Anne Etchegoyen eta Landarbaso Abesbatza kantari aritu ziren ordu eta erdi pasatxo iraun zuen kontzertuan. Astelehena izateko, jendez lepo zegoen zumardia, jaietarako grinarekin. Festa gosea apur bat berdindu zuten, bukaeran zezensuzkoa atera zutelako —ohikoa baino light-agoa—, eta madalenetako beste ereserkia den Diana ere jo zuten. Zentenarioa entzuteko bost ordu itxaron beharko dituzte. Itxaronaldia hain luzea ez izateko, hainbat ekitaldirekin gozatzeko aukera egongo da. 14:00etatik aurrera herri bazkaria egingo dute Herriko Plazan. 1630ean, berriz, haurrentzako Batuburrunba aterako da Gamon Zumarditik, 16:30ean. Oarsoirriak taldeak antolatu du, baita ordubete beranduago egingo duten txupinazo txikian ere. Koloretako zapiak eramatea gomendatu dute. Txupinazo nagusia baino ordu erdi lehenago, dantza luzea egingo dute Herriko Plazan bertan. Ondoren, iaz estreinakoz abestu zuten bertsoa kantatuko dute —memorizatu nahi duenak, hemen du letra—. Hibaikak txupina botata, hasiko dira, orduan bai, madalenak. [nggallery id=109]

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.