Ostiralean hasiko dira Donibaneko jaiak

1989 urtean banku mugikorreko Espainiako txapelketa irabazi zuten arraunlariek botako dute txupina

Donibaneko santioak 2014

Marmitakoa prestatzen dute urtero Donibaneko jaietan

Santio bezperan hasi eta San Inazio egunez bukatuko dira Donibaneko festak. Jai batzordeak prest du jada jai egitaraua, urtero legez, luze bezain oparoa. Ostiralean Nekane Alcaraz, Karmele Etxarri, Ines Etxeberria eta Arantza Sistiaga arraunlari ohiek piztuko dute jaien hasiera iragarriko duen suziria. 1989an banku mugikorreko Espainiako txapelketa irabazi zuten aurten omendutakoek. Hortik aurrera festak luze joko du. Santio Eguneko sokamuturra, dantza txapelketa eta herri kirolak; Santa Ana eguneko habanerak, San Pantaleon eguneko sardina jatea, eta San Inazio eguneko batelarien  estropada, danborrada eta su artifizialak. Festetako klasiko guztiek dute aurten ere toki jai egitarauan. Baina sorpresarik ere bada. Herrien arteko herri-kirol desafioan, esaterako, aurten, Donibane eta Intxaurrondo izango dira aurrez aurre, eta egun berean, Eneko Sein 100 kiloko harria altxatzen saiatuko da. Hilaren 30ean izango da hori, osteguna, baina aurretik beste hamaika jarduerez gozatzeko aukera izango da Donibanen. Aiton-amonen aterpea Donibaneko erretiratuek egun bat lehenagotik hasiko dira jaiak ospatzen. Ramoni Arozenak  eta Narciso Celayaranek altxatuko dute aurten ikurrina erretiratuen egoitzan, 18:00etan, eta aurreskua dantzatuko diete. Trafikoa Jaiak bitartean kalea ibilgailuentzako itxita egongo dela ohartarazi du udalak, ondorengo ordutegian: ostiralean, 17:30etik aurrera;  larunbata, egun osoan;  igandean 12:00etatik aurrera; hilak 27an, astelehena: 10:00etatik aurrera, hilak 28an, asteartea, 11:00etatik 16:00etara;  hilak 29an 16:30etik aurrera; hilak 30ean, osteguna,  10:00etik aurrera eta San Inazio egunean egun osoan. Halaber, jakinarazten dute Nabalaldeko kaia herritar eta bisitarientzat irekiko dutela hilaren 25ean, 26an, 27an, 30ean eta 31n.  
Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.