Erraztasunak nagusi dira euskaltegietako aurtengo eskaintzan

Atzo arratsaldean aurkeztu zuten matrikulaziorako landu duten kanpaina, Trintxerpeko alkateordetzan

Trintxerpeko alkateordetzan, atzo, euskaltegietako eskaintzaren aurkezpenean

Trintxerpeko alkateordetzan, atzo, euskaltegietako eskaintzaren aurkezpenean

Herriko euskaltegiek atzo arratsaldean aurkeztu zuten 2015-16 ikasturterako prestatu duten eskaintza. Matrikulazio kanpaian zabalik da Pasaiako euskaltegietan, eta gaurtik aurrera Igerufilms ekoiztetxearekin eta Strogoff diseinu eta komunikazio enpresarekin landu dituzten euskarriak zabaltzeari ekingo diote. Horiek guztiak aurkeztu zituzten atzo, Trintxerpeko alkateordetzan, kanpainarako propio landu dituzten spotetan parte hartu dutenetako asko –euskaltegietako ikasleak kasu askotan– bertan zirela. 2011. urteko euskararen plan estrategikoan jasotako proposamenak aurrera eramateko, AEK eta Pasaiako Udal Euskaltegia elkarrekin ari dira lanean azken urtetan, eta atzo ere, elkarrekin egin zuten ikasturterako eskaintzaren aurkezpena, udalaren laguntzaz. Euskara zinegotzi Miriam Canok eman zien sarrera euskaltegietako arduradunei, eta hauek azaldu zituzten aurtengo eskaintzaren berezitasunak. Nabarmendu zutenez, gazteentzako, gurasoentzako, langabetuentzako, nahiz merkatarientzako eskaintza berezituak dituzte aurten ere. Horrez gain, pasaitar askorentzat euskara ikastea doakoa izango dela esan zuten. Izan ere, ikastaroa doakoa izango da langabetuentzat, ikasleentzat, Pasaiako elkarteekin lanean diharduten entrenatzaileentzat eta monitoreentzat, 0 eta 12 urte bitarteko haurrak dituzten gurasoentzat eta merkatarientzat. Guztiei itzuliko zaie matrikularen %100, baldin eta ikastaroaren %85eko asistentzia betetzen badute, eta araudian zehazten diren baldintzak betetzen badituzte. Gainerako herritarrei matrikularen zenbatekoaren %75 itzuliko diete. GAZTEENTZAKO IKASTAROAK Ezaugarriak: Gazteen gogoko gaiak landuko dituzte, eta beraiek aukeratuko dituzte gaiak, tailerretan lantzeko. Astean bost ordu: 3 eskola ordu eta 2 tailer ordu. Urria-ekaina bitartekoa. Prezioa: 165 euro (orduko euro bat). B alditan ordaintzeko aukera (%50 azaroan eta %50 abenduan). Beka-sistema: asistentziaren %85 gainditzen duenari, matrikularen %100 itzuliko diote.   GURASOENTZAKO IKASTAROAK Ezaugarriak: Gurasoen intereseko gaiak lantzen dituzte eskoletan; haurrek ikastetxeetan lantzen dituzten abestu eta jolasak irakasten dizkiete, eta haurra eskolatua dagoen ikastetxean bertan egin daiteke ikastaroa, taldea sortzen bada. Astean sei-zortzi ordu: Astean bi edo hiru egunetan. Urria-ekaina bitartean. Prezioa: 153,11 euro. Beka-sistema: asistentziaren %85 gainditzen duenari, matrikularen %100 itzuliko diote. LANGABETUENTZAKO IKASTAROAK Egunean bost ordu eta astean lau eskola egun: astelehenetik ostegunera bitartean. Hiruhileko ikastaro trinkoan: Urria-abendua bitartekoa; urtarrila-martxoa bitartekoa, eta apirila-ekaina bitartekoa. Ikastaroa doan: ez da matrikularik ordaindu behar, baina asistentziaren %85 gainditzen ez duenak ikastaroa amaitu ondoren matrikula ordaindu beharko du (289 euro). MERKATARIENTZAKO  IKASTAROAK Ikastaroa online, dendan bertan: Astean lau ordu autoikaskuntza: dendariak, bere kabuz, dendan; astean ordu eta erdi mintzapraktika, euskaltegian, merkatarien taldea elkarrekin; astean ordubeteko tutoretza: irakaslea dendara joango da asteko lanak errepasatzera. Astean sei ordu eta erdi:  urria-ekaina bitartean. Ikastaroa doan izateko aukera: Prezioa: 116 euro. Beka-sistema: asistentziaren %85 gainditzen duenari, matrikularen %100 itzuliko diote.        
Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.