Usain gozoa Saldise plazan
Marmitako txapelketa egin dute Saldise plazan, eta 14:30etatik aurrera, 200 lagunek bazkalduko dute.
[nggallery id=135]
Ez zen behar usaimen oso zorrotza, gaur, Saldise plazan hegalaburra prestatzen ari zirela nabaritzeko. Suak piztuta eta labana eskuan, goizeko hamaiketan ekin diote marmitako lapikoa prestatzeari. Hamabi partaide bildu dira: herrikoak zortzi, eta gonbidatuak lau (Errenteria-Orereta, Irun, Hondarribi eta Ibarra).
Horietako bi dira Ines eta Begoña lezoarrak. Aurten bosgarren aldia dute lehiaketan, eta azkena izango delakoan dira, “berriei tokia” egin behar zaiela uste baitute. Iaz bigarren geratu ziren, eta gaur ikusteko dago zer gertatuko den.
Izan ere, epaimahaiak erabaki beharko du zein den marmitako goxoena. Lehiaketa bukatuta, bazkaltzeko txanda izango da. 200 lagunentzako tokia eta jana izango da Saldise plazan bertan.
Batzuk lanean eta besteak dantzan
Santakrutzen barruan, muxiko eguna da gaur, eta goizean zehar Saldise plazan eta inguruan aritu dira dantzariak euriari aurre eginez. Alpargatak eraman dituztenek ikusi dute ez dutela zapata egokiena aukeratu gaur.
Eta plazan, bestalde, umeak protagonista. Gora begira ibili dira batzuk erraldoiei begirik kendu gabe, eta aurrera begira besteak, buruhandietatik ihesi.
Arratsaldekoak, euriaren baitan
Ekitaldi ugari izango da arratsaldean: 17:00etan puzgarrian Lopene plazan eta mutxikoak; 18:00etan, erraldoi eta buruhandien kalejira, Saldise plazatik eta 19:30ean, Orratxen eskutik kale antzerkia, Gurutze Santuaren plazan. Euriaren arabera, lekuz aldatuko dituztela aurreratu dute udaletik: puzgarriak nahiz kale antzerkia Bekoerrotara eramango dituzte.
Gauean, berriz, musikaz beteko dira kaleak: 22:30ean DJ Iker Gurutze Santuaren plazan, eta 23:00etan, DJak, Saldise plazan
