Garbiketa zerbitzua beharrezko baliabideekin hornitzea eskatu du EAJ-k
Zein baliabide behar diren aztertzeko eskatu dio Peñak gobernu taldeari
Errenteriako bideak garbitu eta hiri hondakinak bildu eta garraiatzeko zerbitzua kontratatzeko udal gobernuak garatu duen baldintza pleguari hainbat proposamen aurkeztu dizkiola jakinarazi du EAJk. “Hobekuntza proposamenak dira aurkeztu ditugunak”, azaldu du Maite Peña bozeramaileak. Peñaren hitzetan, udalak adjudikatzen duen kontraturik ia garrantzitsuena omen da garbiketa zerbitzuarena, “iraupen luzekoa gainera, eta horregatik, udalak arduraz eta zorroztasunez jokatu behar du”.
Zein baliabide behar diren aztertzeko eskatu dio Peñak gobernu taldeari, “ahalik eta zerbitzurik egokiena emateko eta udalerria garbi mantentzeko. izan ere, orain zehaztu behar dira udalerri osoari zerbitzua emateko behar den kale garbigailu kopurua edo ekipamenduak egoki mantentzeko garbiketa sistemak”.
Irizpide objetiboei garrantzia
Irizpide objetiboei subjetiboei baino garrantzi handiagoa emateko eskatu dio gobernu taldeari EAJk, gutxienez %50ekoa, eta proposamen ekonomikoari garrantzi handiagoa emateko: “Makinen amortizazio epeak xehetasunez aztertzea ere eskatu diogu gobernu taldeari, eta baita kontraturako baldintzak ere, ahalik eta zerbitzurik egokiena bermatzeko eta kontratua ez garestitzeko amortizazioa azkarregi egiteagatik”.
Prebentzio lanak ere aipatu ditu EAJk eta udalerrikom auzoen mantenuari modu berezia erreparatu behar zaiola nabarmendu du. “Beharrezkoa da sentsibilizazio kanpainak martxan jartzea herritarrek barneradezaten zeinen garrantzitsua den guztiona dena errespetatu eta zaintzea. Kale, eraikin eta eremu publikoak txukun mantentzea ezinbestekoa da”. Hiri erdigune zein gainerako auzo guztietan kartelak kendu eta pintadak garbitzeko lanak egunero egitea proposatu du azkenik alderdi jeltzaleak, “egun udalerriak duen utzikeria eta zikintasun irudiari irtenbidea emateko”. 
