Juneren Hegoak Egunak itxaropen mezua zabalduko du
Itxaropen mezua zabaldu nahi du Juneren Hegoak elkarteak lehenengo jaialdiaren bidez, eta batez ere, eskerrak eman.
Juneren Hegoak Eguna ospatuko dute lehenengoz. Datorren larunbatean izango da Xabier Olaskoaga plazan, eta haurrei begira egitarau zabala bezain aberatsa prestatu dute. Yoli Martin Juneren Hegoak elkarteko kideak, eta Ion Collar Kultura zinegotziak eman dute ekimenaren berri, eguerdian egin duten agerraldian.
Itxaropen mezua zabaldu nahi dutela esan du Martinek lehenengo jaialdiaren bidez, eta batez ere, eskertza jaia izango dela larunbatekoa: “Gurekin dauden familiei eman nahi dizkiegu eskerrak lehenik eta behin, ez delako erraza seme-alaba gaixorik izatea eta laguntza eskatzea. Ez delako erraza halako egoera batean izanda eta egunero indarra izatea aurrera egiteko. Guretzat miresgarria da eta pizten gaitun erregaia da”.
Eskerrak eman
Elkartea orain bi urte sortu zenetik, beraiekin bat egin duten elkarte, norbanako, enpresa eta saltokiei ere eskerrak eman nahi dizkiete jaiaren bidez, “jende asko mugitzen delako gure elkartearen inguruan”. Halaber, herritarren parte hartzea bultzatzea dela helburua nabarmendu du elkartearen ordezkariak: “ideiak eta proiektuak partekatu eta elkartasun bideak zabaltzeko ere baliatu nahi dugu jaia”.
Haurrak izango dira jaiaren protagonistak, txikienei begira antolatu baitute lehenengo Juneren Hegoak Eguna, eta 11:00etan hasita egun osoan zehar, tailerrak, magia, antzerkia eta musika ere ez dira faltako.
Errenterian antolatzea, garrantzitsua
Errenteria-Oreretan sortu zen Juneren Hegoak Elkartea, eta egun, bertan eta Donostialdean ari da lanean boluntarioen bidez. Jaialdia Errenterian antolatzea oso garrantzitsua dela elkartearentzat nabarmendu du Martinek, “bertakoak garelako eta Errenterian jasotzen dugun maitasuna eta elkartasuna izugarria delako”. Elkarteko kideen lana bezala, larunbateko jaialdian parte hartuko duten guztien ekarpena ere doakoa izango da, “musutruk ariko dira, eta haiei ere eskerrak eman nahi dizkiegu”, gaineratu du Martinek.
Errenteriako Udalak emandako laguntza ere eskertu du. Collarrek Errenteria solidarioa eta bizia dela esan du, eta udaletik euren esku dagoen guztia egiten saiatzen direla: “Errenteriako bizilagunak solidarioak gara ez gure herrian bakarrik, baita ere beste herriekin ere eta horren adibide da errefuxiatuen afera. Udaletik egin dezakeguna da babestu ahal dugun guztian Juneren Hegoak bezalako elkarteak”. Horren harira, Juneren Hegoak elkartearen lana egunerokoa dela nabarmendu du Kultura zinegotziak, “umeen aurpegian irrifarra margotzeko egunero ari dira lanean, eta horrek ez du preziorik”. Eguna babesteaz gainera, errenteriar guztiak deitu ditu lehenengo jaialdi honekin bat egitera eta aktibo izatera halako ekimenekin.
Mindara, gonbidatu berezia
Gonbidatu berezia izango du Juneren Hegoak Egunak, Mindara elkartea, hain zuzen ere. Mindarak beste esparruen artean haurrekin ere lan egiten duela zehaztu du Martinek: “Elbarritasun eta mugikortasun arazoak dituzten haurrekin lan egiten du Mindarak eta larunbatean erralitate hori presente izatea nahi genuen ere”.
Juneren Hegoak Eguneko egitaraua
- 11:00. Aurkezpena. txikientzako eskulanak eta Disney pertsonaiak.
- 12:30. Pintxo paella solidarioa euro 1ean, David de la Calle eta Hugo Iragorriren eskutik.
- 12:30. Jon Bergaretxe abeslaria.
- Xabier Olaskoaga plazan, prezio herrikoietan bazkaltzeko aukera izango da. Xera: Juneren Hegoak bakailaua; Amonaren Txokoa: Juneren Hegoak txahal masailak; Desira: Juneren Hegoak pintxo potea 14:00etatik 16:00etara; Telepizza: Juneren Hegoak Pizzatxoa.
- 16:30. Ane eta piratekin Parrandan ikuskizuna.
- 18:00. Sarien zozketa eta txokolate jatea Irin okindegiaren eskutik.
- 18:45. Edu magoa.
- 19:15. Zaria Txo abesbatza.
- 19:45. Landarbaso abesbatza.
- 20:00. Amaiera.
