Auzokonpostak eman du lehen uzta Errenteria-Oreretan
Konpost heldua Fanderia, Agustinak eta Gaztañoko auzo konposta gunetan lortu dute momentuz, eta hiru puntu horietako konpost ontzietako konposta umotua aztertzen ari da.
Joan den urteko maiatzean jarri zuen martxan udalak auzo konposta programa, eta urtebetera eman du lehen uzta. Hala jakinarazi du Jose Cruz Legorburu Ingurumen zinegotziak. Auzo konpostan parte hartzen duten familiek, janari hondarrak konpostatu egiten dituzte, ez dituzte beraz, bestelako hondakinekin nahasten. Legorburuk emandako datuen arabera, “%40 murrizten dute familia horiek zabor poltsa eta ondorioz, zabor kopuru hori ere ez dute zabortegira bidaltzen”.
Fanderia, Agustinak eta Gaztaño auzoak izan dira aitzindari Errenteria-Oreretako auzo konposta programan. Alabergako familiek egin zuten bat, ondoren, eta baita Uztargi Udal Haurtzaindegiak eta Sanmarko Gotorlekuko jatetxeak.
Umotuaren kalitate fisiko-kimikoa
Konpost heldua Fanderia, Agustinak eta Gaztañoko auzo konposta gunetan lortu dute momentuz, eta hiru puntu horietako konpost ontzietako konposta umotua aztertzen ari direla gaineratu du Legorburuk: “Umotuaren kalitate fisiko-kimikoa ezagutzeko laginak hartu ditugu eta Fraisoro laborategi publikora bideratu analisiak egiteko”.
Barazki, haragi edo arrainen hondar organikoekin eta eraldaketako prozesu natural baten ondoren kalitate handiko ongarria lortzen dela esan du Ingurumen zinegotziak. Horri programa horren alde egin duten familiek hondakinak biltzeko udal sistema %40 gutxiago erabiltzen dutela gehitu behar zaiola azaldu du, “egunero ingurumena eta osasun publikoa zaintzen saiatzen dira, beraz”.
Auzo konposta sistema beste auzo batzuetara zabaltzea aztertzen ari dela udala esan du, amaitzeko, Legorburuk. 
