Adimen urritasuna duten pertsonak gainontzekoak bezalakoak direla, behar berdinak eta gustu berdinak dituztela da Atzegik aurtengo kanpainarekin lau haizetara zabaldu nahi duen mezua.
Atzegiren kanpaina aurkeztu zuten atzo Errenteria-Oreretan
Adimen urritasuna duten pertsonak gainontzekoak bezalakoak direla, behar berdinak eta gustu berdinak dituztela da Atzegik aurtengo kanpainarekin lau haizetara zabaldu nahi duen mezua. Kanpainaren berri emateko agerraldia egin zuten atzo arratsaldean Atzegiko ordezkariek eta Oarsoaldeko adimen urritasuna duten hainbat lagunek eta haien senideek. Ainhoa Fiz Atzegiko teknikariak esan zuenez, sentsibilizazioa lortzea da urteroko kanpainen helburua. Aurtengo kanpainarekin, bereziki ” kalean, jendartean zabalduta dauden usteak apurtu” nahi dituztela esan zuen.
Adimen urritasunaren gaineko “irudi errealagoa” eman nahi du Atzegik, eta horretarako, urritasuna duten pertsonak bilakatu ditu protagonista aurtengo kanpainan. Zortzi mila kartela banatuko dituzte Gipuzkoa osoan, eta horietatik 400 eskualdean. Karteletako protagonistek euren bizimodua nolakoa den asmatzera animatzen du irakurlea: “Galdetegi moduko bat dira kartelak eta bere bizimodua edo gustuei buruzko informazioa ematen du protagonistak bertan. Askotan pentsatzen dugulako adimen urritasuna duten lagunek ez dutela lanik egiten, ez dutela etorkizunerako ametsik, haurren jarrera dutela… eta ez da horrela”.
Ikastetxeetan lanketa
Kartelekin batera,
Atzegiren webgunean adimen urritasuna duten pertsonek erantzundako galdetegiak daudela eskura gaineratu du Fizek,
Horrelakoa da nire bizitza izenburupean, “Helburua ikastetxeetan eta hitzaldiak emateko erabiltzea da”. Sare sozialak ere astindu nahi ditu Atzegik, eta #Horrelakoa da nir bizitza traola ere sortu du. Traola erabilita, adimen urritasuna duten pertsonek argazkia bidali eta euren egunerokoa nolakoa den kontatzea da helburua.
Mari Carmen Castro eskuladeko delegatuak hartu zuen hitza ostean. Adimen urritasuna duten pertsonei, besteei gustatzen zaizkien gauza berak gustatzen zaizkiela esan zuen berak ere, “zinemara joatea, dantza egitea… behar berak dituzte eta pertsona bakoitza bakarra eta berezia da”. Alaba zuen ondoan, Amaia Fernandez pasaitarra. Adimen urritasuna du Amaiak eta egunero egiten duena kontatu zuen agerraldian: “Jaiki eta lanera joaten naiz. Pasaiako Udalean egiten dut lan eta bulegoz bulego ibiltzen naiz gutunak eta paper ofizialak banatzen”. Arratsaldeetan EPAra joaten da, ikastera eta lagunekin egoteko tartea ere aurkitzen omendu gustuko duen pintxo poteaz gozatzeko.
Ikusgarri egitea, beharrezkoa
Atzegik egiten duen lana garrantzitsua dela esan zuen Nagore Basurto Gizarte Zerbitzuetako arduradunak, eta ezinbestekoa dela ikusgarria egitea gaineratu zuen: “Beharrezkoa da kalera ateratzea, agerian jartzea jendeak ikusteko eta sentsibilizazioa lortzeko”.
