EH Bilduk "gehien dutenen mesedetan aritzea" leporatu dio gobernu taldeari
Ondare Higiezinen Zergaren gaineko errekargua bertan behera utzi izana kritikatu dute, baita oinordetzan jasotako etxebizitzen gainbalioan %50eko hobaria ezarri izana ere.
2016rako udal tasak onartu zituen lehengo asteartean Pasaiako udalbatzak, bi berritasun nagusirekin: etxe hutsen Ondare Higiezinen Zergaren gaineko %150eko errekargua bertan behera utzi zuten, eta oinordetzan jasotako etxebizitzen gainbalioan %50eko hobaria ezartzea adostu zuten. EH Bilduk, baina, bi berritasunen kontra agertu da, “gehien dutenen mesedetan” hartutako neurriak direla argudiatuta.
Aurreko legegintzaldian ezarri zuen EH Bilduk OHZren errekargua, gogoratu dutenez, etxe hutsak merkaturatzeko helburuz, eta baliabide gehiago zituenak ekarpen handiagoa egin zezan, gizarte laguntzen beharrei aurre egiteko.
EH Bilduk esan duenez, errekargua ezarriz geroztik Pasaian behera egin du etxe hutsen kopuruak. “Horren adierazle, urteroko errekarguaren diru sarreren kopurua gutxituz joan izana” aipatu dute. “Neurri ezkertiarra eta progresista zela” defendatu du EH Bilduk, eta harridura agertu dute, bai PSE-EEk, baita Pasaiak Ahal Du-k ere, hura ezabatzearen alde egin izanari.
“Zergen progesibotasunaren aurka”
Oinordetzan jasotako etxebizitzen gainbalioan %50eko hobaria ezartzea izan da, EH Bilduren iritziz, bigarren atzerapausoa: “Gobernuak ‘alargunei’ laguntzeko dela dio, baina egoerak ez dira inoiz berdinak izaten eta kasu honetan ere zehaztasun eskasarekin jokatu du Gobernuak”, kexatu dira. EH Bilduren iritziz, errenten araberakoa beharko luke hobaria.
Bi neurriak “zergen progesibotasunaren aurkakoak” ez ezik, udal finantziazioaren kontrakoak direla defendatu du koalizio abertzaleak: “Gure kalkuluen arabera 185.000 euro inguru gutxiago suposatuko dizkio udalari”, esan dute, “urte beteko kale argiteria ordaintzeko adina”.
Diru galera horrek, zerbitzuen kaltetan jokatuko duenaren beldur da EH Bilduk, edota, etorkizunean “beste zerga edo tasen igoera, zorpetze handiago bat, edota guztiak batera”. “Beste atzera pausu bat; atzera eta eskubira emandako pausua”.