Adinduak etxean zaintzeari buruzko hitzaldia antolatu dute
Hilaren 24an izango da hitzaldia, Trintxerpeko Alkateordetzan, 18:00etan
Adinduak etxean zaintzen dituzten familiei begira, Pasaiako Udalak hitzaldia antolatu du. Hilaren 24ean izango da, Etxean zaintzearen erronka izenburupean, 18:00etatik 20:30era, Trintxerpeko alkateordetzan.
Orain dela hamar urte ekin zion udalak Gipuzkoako Foru Aldundiaren Sendian programan parte hartzeari, hain zuzen ere, adineko mendekoen ardura duten familiei lagundu asmoz. Hitzaldia, programaren kolaboratzaile, psikologo eta psikoterapeuta Karmele Gurrutxagak emango du. “Mendekotasuna duen pertsona zaintzeak, beste eragin batzuk ditu maiz: zaintzaile garenon beharrak ahaztea; denbora librea murriztea; etxetik kanpora gero eta harreman gutxiago izatea…”, adierazi du Gurrutxagak, eta garrantzitsua iritzi dio hori guzia ikustarazi eta kontuan hartzeari: “Hau guztia da etxean zaintzearen erronka: besteengana jarraitu, eta aldi berean, gu-geu zaintzaile bezala zaintzea, gure bizitza eta beharrez arduratzea”.
Zaintzaile taldea
Pasaian, Sendian programaren zaintzaile talde bat bada, gizarte zerbitzuekin elkarlanean antolatutakoa, eta hileroko bigarren eta laugarren asteartetan biltzen dena. Hitzaldiaren helburua, besteak beste, taldea ezagutaraztea da. Aipatu taldean herriko zaintzaileak biltzen dira elkarren artean entzun, ulertuak sentitu eta babesa emateko.
