Batzarrak ondorioztatutakoak plazaratu ditu herri plataformak, erakundeek biziberritzearekiko duten jarrera gogor gaitzetsiz
Kaiko Herrera herriarentzat izan dadila exijitu du beste behin Herrera Herrirak
“Ez dugu onartuko kaiko Herreraren lurrarekin espekulatzea, ez lehen, ez orain, ez eta bihar ere”, adierazi dute Herrera Herrirako kideek. Lehengo urriaren 24an bildu ziren herri batzarrean, Trintxerpen, biziberritzearen inguruan azkenaldian izan diren adierazpenak eta mugimenduak aztertzeko, eta gaur eman dituzte aditzera orduan ondorioztatutakoak.
Salatu dutenez, “Portu Agintaritzak, Eusko Jaurlaritzak eta aldundiak egungo gobernu taldearen konplizitatearekin bultzatzen ari diren ustezko biziberritzeak kaiko Herrera behin betiko kolonizatzeko asmoa ezkutatzen du, ingurua burdinarentzako biltegi bihurtuz, eta beren etekin ekonomikoa lehenetsiz Kaiko Herreraren inguruan bizi diren 40.000 pertsonen kaltetan”.
Herritarren erabakiak ez dituztelako aintzat hartzen kexu agertu dira, eta gogorarazi dute “egiazko biziberritzea 2009an abiatu zela, herritarrek leheneratzearen motorra eta subjektu izatea erabaki zutenean”. “Herritarren parte hartze zuzenik gabe ez dago biziberritze posiblerik”, esan dute, eta diagnostikoa egitean, proposamenak egiterakoan zein beharrak atzematean kontuan hartuak izatea eskatu dute.
Zentzu horretan, batzarrak eskaera zuzena igorri dio udal gobernu taldeari, “herritarrek orain arte eraikitakoa errespetatzeko eskatuz, eta haren defentsa behar den tokitan konbentzimenduz egin dezan exijituz. Bide beretik, Udalak berak Herrerarako onartutako ordenazio irizpideak kontuan hartzeko eskatu dute.