Alderdi politiko guztietako ordezkariak ez ezik, gizarte eta kultur arloko askotariko pertsonalitateak batu dira 'Memoria Partekatu Baterantz' dokumentuaren aurkezpenean
Argituz elkarteko Sabino Ormazabalek eta Bertha Gaztelumendik egin dute txostena eta beraiek egin zuten atzo aurkezpena
Gutxitan lortu ohi den batasun irudia lortu du beste behin Errenteriak. Alderdi guztietako ordezkari politikoak izan ziren atzo Niessenen,
Memoria Partekatu Baterantz dokumentuaren aurkezpenean. Haiekin batera, indarkeria politikoaren ondorioak zuzenean pairatutako herritar asko izan ziren, eta baita herriko kultur eta gizarte eragile askoren ordezkaritza zabala ere.
Joan den legegintzaldian enkargatu zioten EH Bilduk, PSE-EEk, EAJk, PPk eta Ezker Anitzak Argituz elkarteari, atzo, Memoriaren Egunaren harira, aurkeztu zuen txostena,
Eraikiz zikloan zabaldutako bideari nolabaiteko segida emanaz.
Errenterian 1956tik 2012ra bitarte izan diren giza eskubideen urraketei eta indarkeria-ekintzei buruzko txostena osatu dute Argituz elkarteko Sabino Ormazabalek eta Bertha Gaztelumendik, Errenterian denbora tarte horretan gertatutako motibazio politikoko indarkeriak lantzeko.
Atzoko aurkezpenean Argituz elkarteko kideek nabarmendu zutenez, “lan bukatu gabea” da, “dinamikoa” izateko bokazioarekin sortua, eta berau osatzeko deia egin zuten – liburuarekin batera lana osatze aldera ekarpenak egiteko orria banatu zuten, eta
Internetez ere jasoko dute informazioa–. Memoria eraikitzeko bidean lehen urrats bat baino ez dela nabarmendu zuten, “bizikidetza eraikitzeko bidean bultzada” izan nahi duena.
Txostenean 38 hildako zenbatu dituzte guztira; 28 bizitzeko eskubidearen urraketa; kontraste eta ikerketa gehiago behar duten beste 3 kasu, eta horiez gain, heriotza eragin duten indarkeria politikoari lotutako beste gertakari batzuei lotuta 7 lagun hil direla zenbatu dute. Giza eskubideen urraketak, ikerketa gehiago behar dituzten kasuak, eta beste indarkeriazko kasuak eta sufrimenduak kontuan hartu dituzte. 60 orrialdeko kronologia bat ere argitaratu dute.
Horiez gain, bederatzi lagunen testigantzak jaso dituzte, elkarrizketa sakonen bidez, eta horiek aipatutakoak erreferentzia gisa hartuta, herriko indarkeriaren historian izan diren hamahiru mugarri zerrendatu.
Testigantza zuzena eman duten guztiak, –Miguel Buen Lacambra, Angel María Elkano Etxebeste, Jose Manuel Ferradas Freijo, Jose Manuel Herzog De Bustos, Garazi Lopez Etxezarreta Auzmendi, Mari Jose Molina Guerrero, Maite Peña Lopez, Jose Angel Rodriguez Medina eta Mikel Ugalde Ugarte–elkarrekin izan ziren atzo aurkezpenean, lehen ilaran eserita.
[nggallery id=153]