Pavel Viñas Senaturako aurkeztuko da
Espainiako Gorteetako hauteskundeak gertu, agerraldia egin zuen atzo EH Bilduk. Senaturako hautagaia izango den Viñas oiartzuarraren aurkezpena egin zuten.
Atzoko agerraldia
Espainiako Gorteetako hauteskundeak gertu, agerraldia egin zuen atzo EH Bilduk. Senaturako hautagaia izango den Pavel Viñas Zapirain oiartzuarraren aurkezpena egin zuten eta heldu diren egunotako ekimenak azaldu zituzten.
Hala, Viñasek hitza hartu eta Gipuzkoatik hautagaiak diren Marian Beitialarrangoitia (Kongresurako) eta Urko Aiartza (Senaturako) aipatu zituen eta bakoitzaren lana goraipatu zuen, zerrendaburu “ezinhobeak” direla esanez. Madrilera joateko arrazoi asko daudela nabarmendu zuen: “Euskal Herrian hartu behar ditugu erabakiak eta horiek defendatzera joan behar dugu. Horretarako euskal herritarron ahotsa Madrilera eraman behar dugu”. Ezarritako marko juridiko-politikoa defendatu behar dela azaldu zuen. Bere agerraldia abenduaren 6ko mobilizaziora joateko deiarekin bukatu zuen. Egun horretan independentziaren aldarria egin nahi dute Bilboko kaleetan eta herritarrak bertarako joateko animatu zituen.
Hurrengo egunetako ekimenak
- Etzi, abenduak 2, Marian Beitialarrangoitiak eta Maider Carrerek hitzaldia emango dute udaletxeko areto nagusian, 19:00etan hasita.
- Abenduaren 6an, Espainiako Konstituzioaren egunean, Bilbon mobilizaziora deitu dute. Autobusetan izena emateko tokiak Amazkar taberna eta Garmendi txokolategia dira.
- Abenduaren 9an, Alkartetxean etxez etxe banatzeko bozkak auzolanean prestatuko dituzte 17:00etatik aurrera.
- Abenduaren 12an, hauteskunde kanpainako ekitaldi nagusia izango da Oiartzunen, 12:00etan. Independentziarako eman nahi den pausoa irudikatzeko bakoitzak etxetik zapatak eramateko eskatu dute.
