Kabareta eta zirkua izango dira Badia Eskolaren gabonetako emanaldien ardatzak
Hilaren 22an kabareta eskainiko dute Antxon, Pasaia Musikalekin elkarlanean. Biharamunean, zirku tailerra eta emanaldiaren txanda izango da.
Badia Eskolak gabonetako antzerki jaialdia antolatu du datorren asterako, eskolako ikasleekin zein konpainia eta talde profesionalekin. Hilaren 22an kabareta izango dute oinarri. Ez da nolanahikoa izango, gainera: taula gainetik 80 antzezle eta musikari pasako dira Kabaret arratsa antzezlana jokatzeko. “Musika, umorea eta sorpresa ugari” izango direla ziurtatu dute antolatzaileek.
Pasaia Musikaleko konbo ikasgaiko M6:30 taldea izango da musika jartzeko ardura hartuko duena. Irene del Amo eta Lorena Egurza ariko dira teklatuekin, Anne Ortega gitarrarekin, baterian Unai Serrano egongo da eta Josu Elberdinek zuzenduko du taldea, pianoaren aurretik. Maitane Urrengoetxeak abestuko du. Badia Eskolako 5. mailatik gorako 70 ikasle inguru izango dira oholtza gainean: Pasaia-Lezo Lizeoa eta Anunciata ikastetxeetan aritzen direnak, baita Antxoko Kultur Etxean ibiltzen direnak.
Saio bikoitza emango dituzte, 16:30ean eta 18:30ean, guraso, senide eta lagunek ikus ahal ditzaten. Azokan izango dira emanaldiak. Badia Eskolak iragarri duenez, “Azokaren ateak zabaltzerakoan zeharkatzean, antzerki mundu magikora sartzeko aukera egongo da. Parte hartzeko aukera izango du, eta sorpresa ugari izango ditu zain”.
Zirku tailerra eta emanaldia
Biharamunean, hilaren 23an, zirkuarekin gozatzeko aukera izango dute antzerkizaleek. Goizean, 11:00etatik aurrera, Zirika Zirkus taldeak zirku tailerra eskainiko du sei urtetik gorako haurrentzat. Zirkuaren mundura oinarrizko hurbilpen bat eman nahi diete umeei, Azokan bertan. Izena emateko telefono zenbaki hauetara deitu beharko da: 617 81 99 81 edo 667 40 06 41.
Arratsaldean, berriz, antzerki talde berak Tren geltokia ikuskizuna emango du, 18:30etik aurrera. Tailerrean parte hartu eta antzezlana ikusi nahi duenak hamar euro ordaindu beharko dituela jakinarazi du Badia Eskolak.
Pasaia Musikaleko M6:30 konboak jarriko du musika kabaretean
