Badiaren hiri-egitura jorratzen duen 'Pasaia Bitartean' emango dute Tabakaleran, etzi
Badiaren inguruko hiri egitura industriarekin batera eraiki zen, eta haren gainbeherak aztarna utzi du. Hori aztertu dute 'Pasaia Bitartean'-en.
Hiru hilabete eskas darama irekita, bere funtzio berriarekin, Donostiako Tabakalerak. Ekitaldi ugari egin dira ordutik bertan, eta datorren ostiralean, Pasaiako Badia eta inguruak aztertu dituen hausnarketa filmikoa eskainiko dute eraikineko Zine Plazan. 19:00etan hasiko da emanaldia.
Pasaia Bitartean (Irati Gorostidi eta Jonander Agirre, 2015) filmak badia inguruko hiri egiturari buruzko hausnarketa egiten du. Industriarekin batera egituratu zen badia ingurua, eta haren gainbeherak aztarna utzi du era berean. Badia zedarritzen duen udalerriaren oraina aztertzen du, baina aldi berean hiria “memoria edukiontzitzat” jotzen dute filmaren egileek. Adibidez, gainbeheran dagoen paisaia industriala eta turistez lepo iristen diren kruzeroen kontrastea alderatzen dituzte egileek.
Etziko emanaldian, hiru zuzendariez gain, Koldo Telleria arkitektoa ere izango da, eta dokumentala bukatzean, hitza hartuko dute. Sarrerak 3,5 euro balio ditu.
Lau gonbidapen bikoitz
Pasaia Bitartean filma ikusteko, HITZAk, Tabakaleraren kortesiaz, lau gonbidapen bikoitz banatuko ditu. Horretarako, Pasaiako Hitzaren facebook orrialdean sartu, eta albistearen postean iruzkina egin beharko du. Iruzkina egiten duten lehenengo lauekin harremanetan jarriko gara, eta gonbidapen bikoitza jasotzeko aukera izango dute.
‘Pasaia bitartean’ ikusteko aukera egongo da etzi.
