Pasai Antxoko Gabonetako Krosaren VI. ekitaldia egingo dute hilaren 26an. Berritasun ugari ekarriko ditu, tartean Ibaiondo frontoia gune nagusi bihurtzea.
Seigarren aldiz egingo dute pasai antxoko gabonetako krosa
Gabonetan hartzen diren kiloak jaisteko, onena, kirola egitea izan ohi da. Antxon ez dute asko itxoingo horretarako. Izan ere, hilaren 26an, 20:00etatik aurrera, Pasai Antxoko VI. Gabonetako Krosa izango da jokoan. Lasterketaren ibilbidea 6,6 kilometrokoa da, barrutiari hiru itzuli handi eta txiki bat (azkena) emanez. Ibilbide guztia asfaltokoa da, eta laua. Irteera Gure Zumardian egongo da, baita helmuga ere. Lasterketa hau aurten ere Pasai Antxoko Jai Batzordeak antolatu du, herriko hainbat norbanako eta talderen laguntzarekin.
Bertan izena emateko aukera zabalik dago
Kirolprobak webgunean abenduaren 25era arte (17:00ak arte). Aldez aurretik izena ematen bada, parte hartzearen prezioa 8 eurokoa da (txip horia edo propioa) edo 10 eurokoa (lasterketa honetarako bakarrik erabiliko den txipa). Probaren egunean ere, abenduaren 26an, izena eman daiteke, 17:30etik 19:30era Ibaiondo frontoian egongo den gunean. Eguneko izen emateak 10 euro balio ditu txip horia dutenentzat, 12 zuria behar dutenentzat.
Dortsalak abenduaren 26an jaso behar dira, 17:30etik 19:30era Ibaiondo frontoian. Bertan, krosaren poltsa ofiziala (dortsalarekin eta hainbat oparirekin) emango zaie parte hartzaileei. Lasterketa bukatzen denean, Super BMk emandako poltsa bat emango zaie korrikalariei, errekuperatzeko edariekin eta jakiekin.
Karreraren aurkezpenean, antolatzaileek nabarmendu dute aurten krosa berriz ere gauez egingo dela, eta bertan parte hartzera animatu dituzte herritar guztiak, Pasaiakoak nahiz kanpokoak izan, ibilbidea egiteko erraza eta azkarra delako. Aldi berean, korrikalari herrikoiez gain, maila handiko lasterkariak ere egongo direla esan dute, bai emakumeen kategorian zein gizonezkoenean.
Ibaiondo frontoia
Aurtengo Pasai Antxoko Gabonetako Krosaren berritasun nagusiena da Ibaiondo frontoia izango dela lasterketaren gune garrantzitsuena, irteerarekin (Gure Zumardian) eta zirkuituarekin batera.
Horrela, barrutiko pilotaleku berrian eguneko izen emateaz gain, korrikalarientzako kontsigna, aldagelak eta dutxak egongo dira. Gainera, behin lasterketa bukatzen denean, sari banaketa han egingo da, 21:30 inguruan. Sari banaketa aurretik eta ondoren, masaje zerbitzua (BI-K eskolak ematen duena) eta luntxa egongo dira parte hartzaileentzat nahiz nahi duen ororentzat.
Sariak eta babesleak
Bederatzi sari banatuko dira guztira abenduaren 26ko krosean. Hala, lehen hiru gizonek eta emakumeek, eta antxotar onenek jasoko dituzte garaikurrak, irabazleek txapelak jasotzeaz gain. Gainera, Zazpitan Bai taldeak aurten ere mozorro onenari saria emango dio. Hortaz, hala nahi duten korrikalariek mozorrotuta parte har dezakete lasterketan.
Proba hau egin ahal izateko Antxoko komertzio eta enpresen laguntza izan dugu. Orotara, babesle nagusiak hogei izan dira, eta babesle laguntzaileak beste lau.
Gainera, garaikurrak barrutiko zortzi establezimenduk babestu dituzte, eta beste askok hainbat gaietan laguntza eman dute.
