Kuadrillen Negua ospatuko dute urtarrilaren 23an, mende laurdena ospatzen hasteko

2016an beteko ditu Kuadrillen Egunak 25 urte. Horretarako, hainbat ekitaldi egingo dituzte, tartean Kuadrillen Negua, uztailaren 23ko jaiaren 'bertsioa'.

Erik Gartzia Egaña

Errenteria-Orereta

2015/12/23

Pasa diren ekitaldietako kamiseta batzuk. Aurtengo kolorea aranja izango da… baina ez dute zer den zehaztu

Eguraldiak kontrakoa dioen arren, udara iristeko asko falta da oraindik. Eta Kuadrillen Egunerako, are gehiago. Datorren urtean 25 urte beteko dira lehen aldiz ospatu zenetik. Herriko Plazan saiheskia prestatzen zuten 30 lagunetik, 1.500 pertsona jasotzen dituen ekitaldia izatera bihurtu da uztailaren 23ko zita. U23a “uste baino gertuago” dagoela adierazi dute Oreretako Kuadrilletako kideek. Ez, baina, uztailekoa, urtarrilaren 23a baizik. Izan ere, egun horretan Kuadrillen Negua izeneko ekitaldia egingo dute, mende laurdena ospatzeko. Edo ospatzen hasteko. Izan ere, ez da urteurrena ospatzeko prestatu duten jai bakarra izango. Kuadrillen Eguna 2.0 Urtarrilaren 23ko jaia egiteko Kuadrillen Egunari arrakasta eman dion formula errepikatuko dute. Neguko hotzetik babesteko —ikusteke dago–, Agirre Lehendakariaren plaza Merkatuzargatik aldatuko dute. 10:00etan kaldereteak muntatzen hasiko dira, eta ordubete beranduago hasiko dira plater gozoenak nor egingo dituen lehiatzen, klasikoa zen txapelketa berreskuratuz. Sukalde lanaren emaitza 14:00etatik aurrera dastatu ahal izango da, eta 16:00etan, berriz, urteurrenaren aurkezpena egingo dute. Bukatzean, Merkatuzar txukun uzteko garaia izango da. Kuadrillen Eguneko klasiko batek ez du hutsik egingo: Dj Bullek. Furgonetaren atzetik poteoa egingo dute tabernaz taberna, baina aurten dj-ari Zorionak zuri abestu gabe izango da. Festak ez du etenik izango: 20:30ean Dj 2ttor jarriko da plateretan, Niessenen. Bazkarirako txartelak Xera, Sindikato eta Arkaitza tabernetan jarriko dituzte salgai. Antolatzaileek adierazi dutenez, besteak beste, erakusketa bat prestatzen ari direla, “denen artean jasotako materialarekin”. Datorren urteko Kuadrillen Eguna “inoizko mundialena” izango dela ere iragarri dute.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.