Zakukada bete ilusio ekarriko dute Olentzero eta Mari Domingik badia ingurura
Udalerriko lau barrutietara iritsiko da bikotea. Harrera ekitaldirik ez zaie faltako, lanean gogor aritu aurretik.
Gabon gaua ate joka dago, eta Olentzerok bihar izango du bere lan egunik gogorrena. Euskal Herriko etxeetan opariak –eta ikatza, kasuan kasu— utziko ditu bihar. Lehenago, baina, udalerriko barrutietatik pasako da. Goizean, Antxon, Alkartasuna dantza taldekoek lagunduko dituzte Olentzero eta Mari Domingi. 11:15ean aterako da segizioa Usozeko kanpatik, eta barrutiko kaleak zeharkatu ondoren, ikazkinak eta Mari Domingik Azokan jasoko dituzte gutunak. Arratsaldean, berriz, Basari elkartekoekin izango dira biak. Abiapuntua berbera izango da, 18:30ean. Kantu jira eta musikak lagunduko dituzte.
San Pedron, berriz, Zamateten egingo diete harrera. Zita 17:30ean jarri dute, eta baserritarrez jantzita joateko eskatu diete. Badiaren beste, aldean, Donibanen, 18:00etan aterako dira Olentzero eta Mari Domingi, Meipitik. Trintxerpen, azkenik, Serafin Esnaola plazan egongo da Olentzero, eskutitzak jasotzen, 18:45ean barrutiko kaleetan zehar ibiliko da. Segizioa osatuko dute Illunbe Musika Eskolakoekin batera. Horiek 18:30ean geratu dira, Andonaegi jauregian, abestien entsegu txiki bat egiteko.
