'Amalur' ikuskizuna eskainiko dute Pirritx, Porrotx eta Mari Mototsek, hilaren 24an
Datorren larunbatean jarriko dituzte 1.500 sarrerak salgai, Elorsoro kiroldegian.
Ugaldetxo Kultur Taldeak, beste behin, Pirritx, Porrotx eta Mari Motots pailazoen emanaldia antolatu du. Hilaren 24an izango da, Elorsoro kiroldegian, 17:00etatik aurrera. Amalur ikuskizuna ekarriko dute pailazoek Oiartzunera.
Emanaldirako 1.500 sarrerak datorren larunbatean jarriko dituzte salgai, Elorosoroko leihatilan bertan. 17:00etatik 19:00etara egongo da irekita, eta gehienez, pertsona bakoitzak zortzi sarrera erosi ahal izango ditu. Bi urtetik gorako haurrentzako sarrerek bost euroko prezioa izango dute, eta helduenek, berriz, zortzi.
Antolatzaileek dei berezia egin diete gurasoei, azken urtetan emanaldiak duen arrakastaren harira. Haurrentzako sarrerei lehentasuna emateko eskatu diete, baita ere bi gurasoak joan beharrean, bakarra joan dadila, “ahalik eta haur gehienentzat tokia egon dadin”.
