Itsaslapurren iazko nesken trainerua "arraunlarien artean" aurrera atera zutela ziurtatu dute
Iaz traineruan aritu ziren arraunlariek klubaren presidenteari erantzun diote, eta zuzendaritzan "ganorarik gabeko egitura" zegoela esan dute.
Traineru denboraldiari begira, OARSO BIDASOKO HITZAK eskualdeetako arraun kluben ordezkarien asmoak jaso ditu. Oiartzungo Itsaslapurrak taldeko presidentearen hitzak ez dituzte ongi jaso iaz, traineruan, arraun egun zuten emakumeek—aurten geratzen ez direla jakinarazi dute—. Horregatik, idatzia argitaratu dute. Adierazi dutenez, “mingarriak” suertatu zaizkie hitz horiek. Aldi berean, eskerrak eman dizkiete pasa den denboraldian euren lanean sinetsi zutenei.
2015eko denboraldi hasierako ideia “borrokatzea” izan zela gogorarazi dute arraunlari ohiek. “Hasieran denok genuen indarra. Amaieran, berriz, gutxi batzuek mantendu genuen indar hori”, esan dute. Iaz Oiartzungo traineruan aritutakoek Hondarribia, Donostia, San Juan eta Hernanin arraun egingo dute. Bertan “borroka egiten jarraituko” dutela jakinarazi dute, “klub bakoitzeko entrenatzaile eta prestatzaile fisikoek ezartzen dizkiguten entrenamenduak motibazio eta indarrarekin aurrera eramateko”.
“Ganorarik gabeko egitura”
Oiartzungo klubean aritutako arraunlari ohiek gaineratu dutenez, iazko denboraldian emakumeen trainerua ateratzeko esfortzurik handiena eskifaia osatu zuten emakumeek eurek egin zuten. “Mutilen taldeko arraunlari eta entrenatzailearen aldetik ere laguntza jaso genuen”, zehaztu dute. “Kontuan hartu behar dugu”, jarraitu dute, “ganorarik gabeko egitura bat zegoela zuzendaritzan”.
Iazko emaitzak “hain onak” ez izatea hainbat hilabetez entrenatzailerik gabe egoteari eta zuzendaritzak “euren lanak ez egiteari” egotzi diote. “Horrez gain, hasieratik ez geunden nahikoa emakume trainerua osatzeko, eta horregatik zaila egiten zitzaigun entrenamendu eta estropadetan trainerua betetzea”, adierazi dute arraunlari ohiek eta denboraldia “lasaiegi” hartzea ukatu dute. Hori bai, irakaspen bat utzi zien pasako denboraldiak: “Gauza bat oso argi geratu zitzaigun: talde batek duen indarra”.
Erlazionatutako edukiaOiartzungo Itsaslapurrek ez dute nesken trainerurik aterako
