Ozen esan negua datorrela
Kuadrillen Egunak 25 urte beteko ditu aurten. Urteurren esanguratsua ospatzeko, tamainako ekitaldiak antolatu dituzte urte osoan zehar. Hilaren 23an Kuadrillen Negua egingo dute, uztaileko jaia formatu txikian
Bi hilabete pasatxo falta dira Zea Mays-en Negua joan da ta abestiaren bideoak Facebook-eko timeline-ak inbadi ditzan. Negua atzean uztea garai pozgarriagoekin lotzen dute bideoa igotzen dutenek.
Errenteria-Oreretan, aurten, urte sasoiaren ohiko gristasunari kolorearekin —laranja, zehazki— eta jaiarekin aurre egingo diote. Neguak festarekin lotutako ekitaldi berria ekarriko du: Kuadrillen Negua. Uztailaren 23an Kuadrillen Egunak mende laurdena beteko du, eta antolatzaileek hainbat ekitaldi ospatuko dituzte urte osoan zehar. Hilaren lehen hizkia eta zenbaki bera duen egunean —urtarrilaren 23an— hasiko dira urteko jarduerak.
Udako Kuadrillen Egunari «omenaldi» bat egin nahi diote datorren asteko larunbatean, Borja Arbelaitz antolakuntzako kideak azaldu duenez, eta horregatik, kalderete lehiaketa berreskuratu dute. «Lehen Kuadrillen Egunean kalderete lehiaketa egiten zuten, eta hortik bazkaltzen zuten denek. Jakirik onena —eta txarrena— aukeratzen zen», gogorarazi du Jone Mendigutxiak. «Uztailaren 23koa dimentsio handi batera iritsi da, eta ezin da horrekin jarraitu. Urtarrilean ikusten genuen aukera kaldereteena berreskuratzeko, ez direlako 1.500 lagun egongo», jarraitu du.
Merkatuzarren kanpoaldean, estalki batzuen babesean, ariko dira bazkariak prestatzen. 10:00etan hasiko dira sukalde mugikorrak atontzen, eta ondoren sukaldari dohainak erakutsiko dituzte. Behar dituzten lanabes guztiak utziko dizkie antolakuntzak, eta itzultzean, erositako janariaren tiketa erakus dezakete, elikagaietan gastatutako dirua jasotzeko —gehienezko diru kopurua 80 euro izango dira—. Merkatuzarren bilduko diren 300 lagunek 14:00etan izango dute jakiak dastatzeko aukera.
Mahaiak, aulkiak eta gainontzekoak jaso ondoren, mende laurdena ospatzeko iniziatiben aurkezpen txiki bat egingo dute (martxoan erakusketa egingo dute, eta maiatzean ekitaldi bat, besteak beste). Gero, 16:30 inguruan, Dj Bull buru dutela, poteoa egingo dute. Zintzurrak busti ondoren —eta beste ezer, espero da— etorriko da berritasuna: Dj 2ttorrekin jaia egingo dute Niessenen, 20:30etik aurrera.
Sarrerak Arkaitza eta Xera tabernetan —Sindikatokoak agortu dira— daude salgai, hamabost euroan. Kalderete lehiaketan parte hartzeko oraindik izena eman daiteke. Trukean ez dute kamisetarik jasoko, madalenetan bezala, baizik eta «eguraldi honentzako egokiagoa» den laranja koloreko zerbait, Arbelaitzek iragarri duenez.
Dinamika baten hasiera
Mende laurdena ospatzearena «aitzakia bat besterik» ez dela aitortu du Arbelaitzek. Izan ere, eta zilarrezko ezteiei garrantziarik kendu gabe, urtero egin nahi duten dinamika berri baten abiapuntua izatea nahi dute.
«Iaz martxan jarri genuen Hamabi auzo, hamabi poteo iniziatiba, uste dugulako ezjakintasun handia dugula gure herriarekiko. Horregatik, auzoetara hurbiltzea erabaki genuen, ezagutzeko eta auzoetako historia ikasteko. Pontikan egin genuen iaz, eta auzoari izena ematen dion baserrian jaiotako emakume bat etorri zen, historia kontatzera. Horrelakoak egiten jarraitu nahi dugu», jakinarazi du Arbelaitzek.
Bere ustez, «atzean dagoen filosofia da garrantzitsuena». Gaineratu duenez, «jaiak inportanteak dira pertsona eta herri bezala, sozializatzeko tresna direlako». Baina jaiak ez ditu modu pasiboan ulertzen, «subjektu aktiboekin» baizik. «Askotan are gehiago gozatzen da lan egiten», ziurtatu du.
«Helburu nagusiena jai mugimenduaren filosofia hori sustatzea da» berretsi du Mendigutxiak, eta, bide batez, mugimendu bat sortzea non jaiak herritik herriarentzat egingo diren.
Ildo horretan, iazko Kuadrillen Eguneko kamiseta urdina apaintzeko marrazkia sortu zuten. Lino fabrikatik kaleratutako emakume bat irudikatu zuten bertan. Aurrera begira, Errenteria-Oreretako historian egon diren antzeko pertsonaiak azaleratzeko asmoa dute.
Gainera, ekitaldiak prestatzerakoan geroz eta jende gehiagok parte hartzen dutela nabarmendu dute. Arbelaitz: «Inoiz baino jende gehiagok erantzun dio erronkari, eta festen ereduan bertikaletik horizontalera pasatu garela uste dut».
Merkatuzarren kanpoaldean prestatuko dituzte kaldereteak
