Gregoriano doinuek hartuko dute Maria Magdalena basilika larunbatean

Lehenengoz emakume talde bat ariko da gregorianoa abesten Errenteria-Oreretan.

Jokin Otamendi, Juan carlos Berzosa, Jose Luis Insausti eta Izaskun Olaizola

Jokin Otamendi, Juan carlos Berzosa, Jose Luis Insausti eta Izaskun Olaizola

Gregoriano kontzertua antolatu du Maria Magdalena Basilikaren Lagunak elkarteak larunbaterako, eta lehenengoz emakume talde bat ariko da gregorianoa abesten Errenteria-Oreretan. Donostiako Ereski Schola Gregorianistako bi taldeak izango dira basilikan 20:00etatik aurrera. Jokin Otamendia da Ereskiren zuzendaria, eta larunbateko kontzertuari begira, hura “primizia” izango dela esan du. Izan ere, emakumeen koru gregorianorik ez omen dago, “gizonak entzuten ohitu gara, ez emakumeek ez zutelako abesten, baina gizonen monasterioak irekiagoak ziren eta emakumeenak, berriz, itxiago”. Larunbateko kontzertuan, gainera, herrialdeko kodizeak oinarri hartuta abestuko omen dute: “Normalean Europa erdialdetik hartutakoak dira, baina Gipuzkoan izan badira eta Azkoitikoa eta Oñatikoa baliatuko ditugu besteak beste.” Organoak laguntzen du normalean kantu gregorianoa, baina Ereskiren kontzertuan arpa izango da ahotsekin batera protagonista. “Ana Artetxe irakasleak joko du, eta hau ere ez da ohikoa, organoarekin entzuten ohituta gaudelako”. Hiru urte daramatza emakumeen gregoriano koruak lanean, eta gogoz ari direla esan du Juan Carlos Berzosa Ereskiko kideak. Emakumeen abesbatzak hasiko du kontzertua. Balorazio positiboa Jose Luis Insausti Maria Magdalena Basilikaren Lagunak elkarteko kideak aurreko urteko ekintzen gaineko balorazio baikorra egin du, bestalde. 14 kontzertu antolatu zituen elkarteak, eta horiek 2.520 lagunek ikusi zituzten, “batez beste 180 lagun izan zen kontzertu bakoitzean”. Bi hitzaldi ere antolatu zituen elkarteak, eta horietan 330 lagun ziren. 2016ari begira Donostiako Ereskirekin zabalduko du elkarteak kontzertu zikloa, baina dagoeneko egitaraua itxita dutela jakinarazi du Insaustik: “Otsailean Aita Garaioa Donostiako abesbatza izango da basilikan, martxoan Donibane Lohizuneko Beltza Gorria abesbatza, eta apirilean Billabonako Eresargi abesbatza”.
Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.