Mamuteko hainbat merkatari euskara ikastaroak jasotzen hasi dira

Oinarrizko ezagutzak jasoko dituzte ikastaroetan, eta udalak finantzazioaren zati handiena bere gain hartuko du. Izena eman daiteke oraindik.

Erik Gartzia Egaña

Oiartzun

2016/01/27

Mamuten egiten dituzte euskara ikastaroak

Mamut merkataritza guneko galerietako bost merkatariz osatutako talde bat euskara ikastaroak jasotzen hasi da. Euskaraz ezer ere ez edo gutxi dakiten pertsonak dira, eta 60 orduko oinarrizko ikastaroa jasoko dute, ekainera arte. Ttur-ttur elkarteak gogorarazi duenez, urtero ahalegina egiten dute Oiartzungo merkatari eta ostalarientzako euskara eskola bereziak antolatzeko. Udalaren laguntza jasotzen du, ikastaroak finantzatzen dituelako, “esfortzu ekonomiko handia” eginez. Lehen aldiz, eskolak Mamut gunean bertan emango dituzte. Izan ere, orain arte, AEK Intxixu euskaltegian eman izan dituzte. Iaz, baina, Mamut merkataritza gunera bisitak egin zituzten, eta ikastaroekiko interesa zuten merkatariak aurkitu zituzten. Horregatik, euskara ikasteko tokia Mamuten bertan ezarri dute, nahiz eta eskaintza udalerri osoko merkatariei irekita dagoen. Bezeroekin harremana Izen emate kanpainaren balantze positiboa egin du Ttur-tturrek. “Merkataritza eta ostalaritzako ordutegiak zailak dira, eta azkenean, bost laguneko taldea aurrera ateratzea lortu dugu”, gaineratu dute. Kutizi lurrin dendako eta Beti Auro kafetegiko langile bana daude ikastaroan, eta M2ko hiru daude. Hala ere, izena emateko aukera dute hala nahi duten merkatari eta ostalariek. Ttur-Ttur Euskaltzaleon Bilgunearekin jarri beharko dute harremanetan, posta elektroniko edo telefono —943 26 01 82— bidez. Fermiñeneko bulegotik ere pasa daitezke. Ikastaro bakoitzak ehun euro balio ditu, eta udalak erdia finantzatzen du hasieratik. Baldintza batzuk betez gero, %70era irits daiteke finantzazioa. Euskararen normalizazioan estrategikoak diren sektoreetan eragin nahi du udalak.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.