Hitzarmenak eta diru laguntzen bideratzea aztertuko dituzte Manuel Lekuona bibliotekan.
![Manuel Lekuona biblioteka](http://oarsoaldea.hitza.eus/site/files/2015/06/Manuel_Lekuona_Biblioteka.jpg)
Manuel Lekuona bibliotekan dute zita
Oiartzungo Euskara Batzordeak ohiko bilera egingo du datorren ostegunean, hilaren 4an. Bost puntuko gai zerrenda jorratuko dute Manuel Lekuona bibliotekako beheko aretoan, 17:00etatik aurrera, bilduko direnek. Alde batetik, udalak eta Ttur-ttur Euskaltzaleon Bilgunearen arteko hitzarmena berritzea aztertuko dute. Gainera, elkarteak ahozko ondarea jasotzeko duen proiektua diruz laguntzea onartuko dute, lehen zatia bideratzeaz gain.
Hirugarren puntuan, Oiartzun Irratiaren inbertsioetarako hitzarmena berritzea eta horren araberako gastu onarpena eta ordainketak bideratuko dituzte. Azken aurreko gaiak enpresa txiki eta ertainetan euskararen erabilera sustatzeko egitasmoaren diseinua izango du hizpide. Zehazki, aholkularitza zerbitzuaren kontratazioaz ariko dira. Azkenik, merkataritza guneetako hizkuntza paisaia euskaratzeko diru laguntzak jorratuko dituzte.