Sortuk ekitaldia egingo du torturapean hil zuten Esteban Muruetagoienaren izena duen plazan.
Tamara Muruetagoiena, aitaren izena duen plazako plaka estalgabetzen, 2010ean
Larunbatean 35 urte beteko dira Joxe Arregi zizurkildarra hil zenetik. Bederatzi egun pasatu zituen Espainiako Poliziaren eskuetan inkomunikatuta, eta bertan jasotako torturak esaldi batekin deskribatu zizkien bere kideei, hil baino ordu batzuk lehenago: “Oso latza izan da”. 1989an Auzitegi Gorenak bi polizia zigortu zituen, zigor oso txikia ezarriz. Bartzelonako 200 sendagilek, bere aldetik, lau lankide salatu zituzten, torturak ezkutatzeagatik.
Urte hartatik aurrera, Torturaren Aurkako Eguna egiten du ezker abertzaleak. Ildo horretan, Sortuk torturaren aurkako ekitaldia egingo du datorren larunbatean herrian. Esteban Muruetagoiena plazan izango da, 13:00etatik aurrera. Muruetagoiena Oiartzungo medikua zen, eta hamar egunez Guardia Zibilaren eskuetan egon ondoren, aske utzi eta hiru egunera hil zen. Sortuk Tortura 40 urtez, Inpunitatea 40 urtez lelopean egingo du ekitaldia.
“Estatuaren tresna”
Sorturen arabera, tortura “estatuaren tresna izan da Euskal Herriaren kontra, bere etorkizunaren jabe izan ez dadin”. Alderdiaren arabera, ez da poliziakide “inkontrolatu eta isolatuen” portaera izan. “Torturaren erabilera ohikoa izan da bortxaren monopolioa izan duten estatuen aldetik, modu sistematikoan”, gaineratu dute. Atxilotuari ez ezik, ingurukoei ere beldurra sorraraztea helburu izan dutela baietsi du alderdiak.
Euskal Herrian 10.000 tortura kasu dokumentatu direla zehaztu dute, “gerra estrategia bati erantzuna emanez”. Horrela, torturak “kolore guztietako gobernuen babesa” jaso duela iritzi dute, “herri honen askatasun egaria ito eta giza eskubideak modu bortitzean txikitzeko helburuz”. Komunikabide “gehienen” jarrera ere salatu dute, tortura kasuen aurrean entzungor egin dutelakoan.
“Espainiako estatuan”, jarraitu du Sortuk, “Estatu itunak sinatu dituzte (Moncloakoa, Ajuria Enekoa…) politikoki bide eman diotena torturari. Itun horietan PP eta PSOE egon dira, baita EAJ ere”. Horrela, lege antiterroristarekin zein salbuespenezko neurriekin bukatzeko eskatu du alderdi independentistak, “tortura desagerrarazteko”.
Bizikidetzaren bidean, “egia ezagutu” behar dela aldarrikatu dute: “Zer gertatu zen? Nork torturatu zuen nor? Ardurak non dauden?”. Erantzun horiek jakin nahi dituztela exijitu dute, “biktimekiko errespetuagatik eta etorkizuna gertatutakoaren gainean eraiki ahal izateko”. Bestela, “bizikidetza errealik” lortuko ez dela uste dute. Gainera, Espainiako poliziak eta Guardia Zibilak Euskal Herria utzi behar dutela adierazi dute.
