[Argazki galeria] Milaka adineko emakume prekarietatean bizi direla salatu du Duintasunak
Miseriazko pentsioak kobratzen dituzten 360.000 pertsonen artean gehienak emakumeak direla esan dute, eta kolektiborik handiena alargunek osatzen dutela zehaztu.
Emakumeen Nazioarteko Egunari keinu egin dio Duintasuna jubilatu eta pentsiodunen elkarteak, eta milaka adineko emakume prekarietate gogorrean bizi direla saltu du, “pobrtasunaren mugaren azpitik bizi gara, diru sarrerak gutxieneko soldatara ere ez direlako iristen”. Miseriazko pentsioak kobratzen dituzten 360.000 pertsonen artean gehienak emakumeak direla esan dute, eta kolektiborik handiena alargunek osatzen dutela zehaztu, “60 urtetik beherako alargunek 600 euro baino ez dituzte kobratzen, SOVI edo familia laguntza jasotzen dutenek 500 eurotik behera dabiltza, eta pentsio kontributiboak ez dituztenak 500 eurora ere ez dira iristen. Gure lanak ez du errekonozimendurik izan eta kasu askotan jubilazio eskubiderik ez daukagu”.
Duintasuna elkarteko emakumeek emakume bakar batek ere ez dezala 1080 eurotik beherako diru sarrerarik izan aldarrikatu dute gaurko elkarretaratzean, eta gaineratu emakumeen konpromezuak jendarte justuago baten alde aurrera egiten lagunduko duela.
Udaletxeko arkupetan egin dute gaur Duintasunekoek elkarretaratzea, eguraldia ez dutelako lagun izan, eta beti moduan hamarnaka lagunek egin dute bat deialdiarekin. Manifestazio egin dute ondoren eta besteak beste 1080 eurotik beherako pentsiorik ez, eta Dirua badago, lapurrak dira soberan oihukatu dituzte ibilbidean.
