Martxoaren 19an egingo dute Oiartzungo Euskal Jaia. Eragile ugarik hartuko dute parte, eta aurten hil den 'Aixegorri' soinujolea omenduko dute.
Araitz Iparragirre eta Garazi Aramendi antolatzaileak eta Josune Cousillas Kultura zinegotzia.
Hurrengo asteburuan, udaberria ez ezik, izango da etorrera berririk herrian: estreinakoz egingo dute Oiartzungo Euskal Jaia. Martxoaren 19an, larunbatean, izango da. Gaur aurkeztu dute jaialdia, eta euskal kulturaren aldeko lana plazaratzea eta herriaren identitatea bizirik mantentzea du helburu.
Eragile ugarik hartuko du parte Oiartzungo Euskal Jaian —ikus zerrenda behean—. Udalak herritarrak gonbidatu ditu egingo diren ekitaldi andanan parte har dezaten, eta bide batez, eragileen lana eskertu du.
Axeigorri gogoan
Lehenengo Euskal Jaiari hasiera emateko ardura Nikolas eta Tomaxi Lasak izango dute. Urte hasieran 87 urterekin hil zen Joxe Lasa
Axeigorri soinujolearen seme-alabak dira.
Gurutzen jaio zen, 1928an, eta baserritik hartu zuen izengoitia. Zortzi urterekin hasi zen soinua jotzen osabarekin, eta hark oparitu zion Hohner txiki bat.
Gazte garaian, Oiartzungo eta inguruko baserri-ezkontzetako eta erromerietako soinujolea izan zen, ama panderojolearen laguntzarekin. Gurutzeko Altzi baserrira ezkondu zen, eta soinua kutxan gorde zuen. Ez betirako, ordea. Helduago zenean hartu zuen berriro, eta Irungo Euskal Jiran hartu zuen parte. Antolatzaileak zein udala bat datoz aitortza egitearekin: “Lehenengoz Euskal Jaia egingo dugu bere herrian, eta tokia eta errekonozimendua egitea ezinbestekoa iruditu zaigu”.
Egitarau oparoa
Eragile askok hartu dute parte egitarauaren osaketan, eta denek izango dute beren tokia. Honakoa izango Euskal Jaiaren programazioa:
- 11:30ean: Festaren hasiera, honako ekitaldiekin. Olarri, Haurtzaro eta Elizalde dantza taldeen emanaldiak herriko plazetan, Lartaungo txistularien, Auntxa Trikitixa Eskolaren eta Haurtzaroko trikitilari eta panderojoleen laguntzarekin. Herri Musika Eskolako dultzaina taldea. Txostpilota taldea, plazan. Oiarpe, Kontzejupean.
- 11:30etik 14:00etara: Artisau azoka, Donibane kalean.
- 12:00etan: Bertsolariak, plazan. Herri kirolak, Landetxen. Oiartzungo Flauta Taldea, Euskal Herria plazan.
- 12:30ean: Dantza-jauziak Kontzejupe plazan, Herri Musika Eskolako xirularru taldearekin. Lartaun abesbatza, elizako eskaileretan; 13:00etan Kastroko iturrian.
- 13:30: Dantza taldeen emanaldia Landetxen.
- 14:00: Bertsolariak, plaza dantzak eta txupina plazan. Madalensorora kalejira.
- 14:30: Herri bazkaria, Madalensoron.
- 16:00etatik 17:30era: Bazkalostea.
- 16:30etik 17:30era: Haurrentzako ludoteka, Madalensoro kanpoan. Helduentzako trikipoteoa.
- 21:30ean: Erromeria Bide batez taldearen eskutik, plazan.
Oiartzungo Euskal Jaia prestatze lanetan parte hartu duten eragileen zerrenda: Olarri Dantza Taldea; Haurtzaro Dantza Taldea; Elizalde Dantza Taldea; Lartaun Abesbatza; Lartaungo txistulariak; Emarri; Soinuenea Fundazioa; Oiarpe; Txost; Oiartzungo Bertso Eskola; Oiartzungo Flauta Taldea,; Abaraxka ludoteka; Oiartzungo Erraldoien Konpartsa; Auntxa Trikitixa Eskola eta Haurtzaroko trikitilari eta panderojoleak.
