Euskal Herri osotik eta Errioxatik heldutako 60 dultzaina eta gaita jotzaile bilduko ditu topaketak .
Oiartzunen orain lau urte egindako topaketa
Dultzainero eta Gaiteroen Topaketa egingo dute larunbatean Errenteria-Oreretan Beti Prest elkartearen eskutik. Lehen aldia da udalerriak topaketa hau hartuko duela, aurretik Oarsoaldeko beste bi udalerrietan egin badute ere, Oiartzunen orain lau urte eta Pasai Donibanen, iaz. Euskal Herri osotik eta Errioxatik heldutako 60 dultzaina eta gaita jotzaile bilduko ditu topaketak . Gaita jotzaile gehienak Errioxatik helduko badira ere, Oiartzundik ere helduko dira.
Hernaniko eskolako arduradun Iñaki Eguren eta Oiartzungo eskolako arduradun Juan Mari Beltranek azken topaketan esan zuten Errenteria-Oreretan egitea polita litzatekeela eta horregatik heldu ziotela gaiari esan du Beti Prest elkarteko diruzaina eta dultzaineroa den Tino Ibeasek, “hori da aurten Errenterian topaketa egitearen arrazoia”. Urtero antolatzen dute, eta herriz herri dabil topaketa. Errepikatu duenik ere ba omen da, baina ez da Oarsoaldeko herrien kasua.
10:30ean bilduko dira topaketan parte hartuko duten musikariak Herriko plazan, eta 11:00etan hasiko dira gaita eta dultzaina doinuz bazterrak alaitzen. Herriko kaleetatik barrena ibilita, Herriko plazan Muxikoak eta Larrain dantza dantzatuko dituzte, “Beti Prest taldeko dantzariak izango dira bertan, baina animatzen diren guztiek dantza egiteko aukera izango dute”.
Dultzaina osasuntsu
14:30ean amaituko da topaketa, eta bertan parte hartu dutenek bazkaria egingo dute ondoren. Ibeasek herritar guztiak animatu ditu parte hartzera eta musikarekin gozatzera, “aukera polita izango dute eta lehen aldia da gainera halako topaketa antolatzen dugula herrian”.
Ibeas bera orain sei urte hasi omen zen dultzainarekin, «Beltranen Oiartzungo eskolan hasi nintzen jubilatutakoan». Beste herrietan indar handiagoa duela akaso, baina Oarsoaldean ere osasuntsu dabilela dultzaina esan du.
Kultur trukaketak izango du buelta eta datorren hilabetean Errioxako hainbat herritan egingo dute topaketa Euskal herriko eta Errioxako gaita eta dultzaina jotzaileek.
Egitaraua
- 10:30: Elkartzea Herriko Plazan
- 11:00: Parte hartzaileentzat hamaiketakoa Gure Toki elkartean
- 11:30: Kalejira eta bisita gidatua Errenterian barrena. Bi talde osatuko dituzte: bata xirolarru eta dultzainena, eta bestea dultzaina hutsena. Lehenengoaren gidak gaztelaniaz egingo du bisita, eta bigarrenarenak euskaraz.
- 13:00: Emanaldia Herriko Plaza. Herri ezberdinetako taldeek dultzaina saio bana eskainiko dute, denen artean kontzertua osatuz.
- 14:30 Parte hartzaileentzat bazkaria Amulleta elkartean
