Mallorcako xirolarru jotzaileak eta danbolinteroak izango dira Ergoienen. Igandean, berriz, Dantza Plazan ekimena egingo dute.
Udaberriko Kontzertua gaur aurkeztu dute.
Soinuenea Fundazioak Udaberriko Kontzertua datorren larunbatean egingo du. Mallorcako zein Euskal Herriko doinuak entzungai izango dira Ergoiengo Auzokalte elkartean. Urtaro bakoitzean kontzertu bat antolatzen du Soinuenenak.
Gaur aurkeztu dute kontzertua, Soinueneko zein udaleko ordezkariek. Jakinarazi dutenez, kanpoko herri musika ordezkatuko duen taldea Es Reguinyol izango da. Hamabost bat kidek osatzen dute,
flavioler (danbolinteroak) eta
xeremierrek (xirolarru jotzaileak). Euskal Herriko musikariak, berriz, Hernaniko Udal Musika Eskolako txistulariak izango dira. Kontzertua 18:30ean hasiko da, eta sarrerak bost balio ditu. Ondoren, afaria egingo dute elkartean, eta horrek hogei euroko kostua izango du.
Goiz horretan bertan, Soinuenean bertan, haurrentzako kontzertu didaktikoa eskainiko dute, Mallorcako herri musika ezagutu dezaten. Kasu horretan, saioa doan izango da.
Udalak herritarrak animatu ditu Euskal Herriko zein kanpoko musika ezagutu dezaten. “Herrian bertan dute musika ezagutzeko aukera eta hori baliatu daiteke”, esan dute. Bide batez, Soinueneren lana eskertu dute: “Herriko kulturgintzan eragile garrantzitsua da, Oiartzungo beste eragile askorekin batera elkarlanean ere aritzen dena”.
Dantza Plazan, igandean
Igandean, berriz, Dantza Plazan saioa egingo dute herriko plaza nagusian, 12:00etatik aurrera. Soinueneko musikariak izango dira bertan, baita Helduen Tailerreko dantza taldekoak ere. Dantza-jauzietan aritzeko aukera izango dute herri musiken doinu artean.