Espainiako Gobernuaren ordezkaritzak jarritako salaketa baztertu zuten, baita orain errekurtsoa ere. Epaiketaren gastuak ordaintzea bere gain ebatzi dute, gainera.
Oiartzungo Udalari arrazoia eman diote, berriro (artxiboko irudia).
Udalbiltzari dirua ematea legezkoa dela ebatzi du Araba, Bizkaia eta Gipuzkoako Auzitegi Nagusiak. Orain dela bi urte, Oiartzungo Udalak 10.000 euroko ekarpena egin zion Udalbiltzari, eta Euskal Autonomia Erkidegoan Espainiako Gobernuaren ordezkari den Carlos Urquijok salaketa jarri zuen erabaki horren kontra.
Auzia irekita, epaileak arrazoia eman zion Oiartzungo Udalari, lehen instantzian: Udalbiltza legezko erakunde bat dela, eta Oiartzungo Udala, hautetsi eta udalen erakunde nazionaleko kide izanda, zilegi eta legezko dela ekarpen ekonomikoa egitea.
Sententzia horri errekurtsoa jarri zion gobernuaren ordezkaritzak, eta apelazioaren emaitzak gauzak argi utzi ditu: Oiartzungo Udalak eman diote, berriro, arrazoia. Gainera, epaiketaren gastuak bere gain hartzea zigortu dute Espainiako estatua.
Gauzak horrela, udalak jakinarazi du Udalbiltza laguntzen jarraituko duela, “Euskal Herri osoko udal eta hautetsien erakundeak euskal nortasunarentzako eta naziogintzarako duen garrantzia dela eta”.