Eskuorriak eta kartelak jarriko dituzte errenta aitorpena egiten duten oiartzuarren kopurua %34,42 baino handiagoa izan dadin.
Errenta aitorpena euskaraz egiteko gonbita atzo luzatu zuten
Urteroko zita ekidinezina da errenta aitorpenarena. Euskaraz eta gazteleraz egiteko aukera dago, eta Oiartzunen urtetik urtera gehiago dira euskaraz egiten dutenak. 2005eko kanpainan 297 izan ziren euskaraz egitea hautatu zutenak, egin zutenen %6,2. Iaz, berriz, 1.834 izan ziren, herena baino zerbait gehiago —%34,42 zehazki—.
Hala ere, kopurua gora egiten ari den arren, oraindik herritar asko dira diru kontuak gazteleraz egiten dituzten euskaldunak. Euskaraz egin dezaten gonbita luzatzeko, Ttur-ttur Euskaltzaleon Bilguneko zein udaleko ordezkariek, beste hainbat herritarrek lagunduta, argazkia atera zuten atzo.
Finantza erakundeen laguntza
Deialdi publikoa egiteaz gain, herriko hainbat tokitan kartelak, eskuorriak eta abar jarri dituzte. Udala UEMAko kide denez, udalerri euskaldunen mankomunitateak erabiltzen dituen kanpaina eta irudia bere egin ditu.
Herrian presentzia duten finantza erakundeek eta aholkularitzek ere bat egin dute kanpainarekin. Horrela, euren bulegoetan kanpainak presentzia izango du, eskuorriekin, kartelekin eta
Errenta aitorpena euskaraz egin dezakezu leloa daramaten kartelekin. Ttur-tturrek eskerrak eman dizkie argazkian atera diren oiartzuarrei, zein babesa eman duten enpresei: Laboral Kutxa, Kutxabank, Nafarroako Rural Kutxa, Sabadell Guipuzcoano, La Caixa, BBVA, Lurgintza nekazarien kooperatiba eta Zubillaga aholkularitza.
Ekainaren 25era arte
Errentaren kanpaina ekainaren 25era arte luzatuko da. Aitorpena egiteko aukeratutako modua edozein dela ere, aitorpena euskaraz egiteko aukera dagoela gogorarazi dute Ttur-tturrek eta udalak. Autolikidazioa jaso dutenen kasuan, jasotako proposamena onartzeko garaian euskaraz ere egin daitekeela nabarmendu dute, baita ere errenta mekanizatua egiteko zita hartzeko garaian edo Interneten euskarazko bertsioa jaistean.