Berriz ere dator Lesoinu
Lesoinu aste pedagogikoaren bigarren zatia igandetik maiatzaren 7ra egingo dute.
Lesoinu 2016 Aste Pedagogikoaren XXX. ekitaldiaren bigarren zatia indartsu dator. Bost musika emanaldik emango diote mamia musika eta herria lotzen dituen jardueraren bigarren zatiari, lehena etzi: Ruper Ordorikak kontzertua emango du Gezalan, 20:00etan hasita. Tomas Garbizu Lezoko Udaleko Musika Eskolak antolatu ditu ekitaldiak.
Lesoinuren jarraipenak, gainera, nazioartera zabalduko ditu hegalak. Izan ere, Donostia 2016 hiriburutzaren barruan hainbat ekitaldi egingo dituzte Gipuzkoako udalerri nagusian, eta bertan egin behar dituztenez gain, inguruko herrietan ibiliko dira ere bertako partaideak kontzertuak ematen. Lezo da horren adibide.
Jarraian, Lesoinuk emango duenaren laburpena egitarau modura:
Igandean kontzertua emango du Ruper Ordorikak Gezalan. Argazkia: Zaloa Fuentes
- Maiatzak 1, igandea: 20:00etan, Gezalan, Ruper Ordorikaren kontzertua (8 euro).
- Maiatzak 2, astelehena: 19:00etan, Gezalan, Francisco Escudero Musika Profesionaleko taldeekin ganbara kontzertua.
- Maiatzak 4, asteazkena: 19:00etan, Gurutze Santuaren plazan, Finlandiako Laulujoutsenet koruaren emanaldia.
- Maiatzak 6, ostirala: 18:00etan, Gurutze Santuaren plazan, Crolleseko musika eskolakom kideen (Frantzia), eta Toledoko musika eskolako kideen (Espainia) kontzertua.
- Maiatzak 7, larunbata: 12:30ean, Gurutze Santuaren plazan, Suediako Svenljunga Culture School-eko majoreteen eta bandaren saioa.
