Eskuetatik azokara

Gaur eguerdian irekiko dute, Merkatuzarren, XXXVIII. Eskulangintza Azoka. 44 tailerren lanaren emaitza ikusteko aukera egongo da igandera arte.

Erik Gartzia Egaña

Oiartzun

2016/04/29

Hainbat materialekin landutako eskulanak aurki daitezke.

Maiatzaren 1ean, Langileen Eguna ez ezik, tradizio bilakatu den zerbait ospatzen da Errenteria-Oreretan: Euskal Herriko Eskulangintza Azoka. Eskuz landutakoen erakusleiho handia bilakatuko da Merkatuzarreko goiko solairua gaur eguerditik aurrera, 38. aldiz. 44 tailerren lanak ikusteko aukera izango da igandera arte. Gehienak —erdia zehazki— gipuzkoarrak izango dira, beste sei Arabatik etorriko dira, bost Nafarroatik, lau Bizkaitik eta beste bat Ipar Euskal Herritik. Gainontzeko seiak Espainiako Estatutik hurbilduko dira. Horietatik hamazazpi lehen aldiz etorriko dira Errenteria-Oreretara, eta hamalau bakarrik izan ziren iazko ekitaldian. Ereintza elkarteak eta Artiola Artisautzaren Guneak antolatzen duten erakustazokan, ohi bezala, material asko lantzen dituzten artisauak izango dira: egurra, burdina eta metala, beira, buztina eta harria, ehuna, larrua, papera eta kartoia, bitxigintza… Horrela, aurtengo berritasun batzuk nabarmendu dituzte antolatzaileek. Besteak beste, Paleike aipatu dute. Egurrezko paleekin —eta besterekin— objektuak egiten dituzte. Dolo Navasek ehunekin eta beirarekin egindako eskulanak ere azpimarratu dituzte. Artista gehiagoren lanak estreinakoz ikusteko parada izango da, gainera: Luis Parades, Imanol Osa, Tilomar, Tulaytelmo, Agurital, La Candela eta Javier Murillo. Prezio sinbolikoak Ereintza eta Artiolaren kalkuluen arabera, 5.000 pertsona pasatuko dira Merkatuzarretik. Jende pilaketak ekidite aldera —baita azoka bera finantzatzeko ere—, prezio “sinbolikoa” jarri diete helduentzako sarrerei: bi euro eta erdi. Bihar arratsaldean, berriz, 16:15etik aurrera, sari banaketa egingo dute. Alde batetik, erakusmahai onena duenari saria emango diote. Bestetik, Artisau Produktu Kalitatearen Saria. Horretarako, lau ezaugarri hartuko dituzte kontuan: ikerketa eta esperimentazioa; diseinua eta estiloen berritasuna; kalitate artistikoa eta produktuaren lanketa eta akaberaren fintasuna. Saridun bakoitzak 350 euro eta diploma jasoko ditu. Eskulangintza Azoka gaurtik igandera arte egongo da irekita. Goizez, 11:00etatik 14:00etara zabalduko dute. Arratsaldez, berriz, 16:30etik 20:30era.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.