Enpresa txiki eta ertainetan euskara sustatzeko abiaraziko dute Lanin egitasmoa

Datorren ostegunean aurkeztuko dute proiektua. Oiartzunen 500 enpresa dira 50 langile baino gutxiago dituztenak.

2016/05/12

Mamut merkataritza zentroa enpresa txiki eta ertain ugariren habi da

Enpresa txiki eta ertainetan euskararen erabilera bultzatu nahi du Oiartzungo Udalak. Horretarako, Lanin izeneko egitasmoa abiaraziko du. Gaur zortzi, hilaren 19an, aurkeztuko dute proiektu hori, Elorsoro kiroldegiko bilera gelan. Bilera ireki formatua izango du, eta bertan Jexux Leonet alkatea, Ioritz Aizpuru euskara saileko zinegotzia eta Mikel Irizar aldundiko Hizkuntza berdintasunerako teknikaria izango dira. Enpresa txiki eta ertainetako kideak —enpresari zein langileak—, euskalgintzakoak zein gaiarekin interesa duen edonor bertaratzera gonbidatu dituzte. 19:00etan hasiko da Lanin egitasmoaren aurkezpena. Sei hileko lehen urratsa Lanin-en helburua tamaina horietako enpresetan euskarak duen presentzia zein erabilerak duen egoera ezagutzea izango da. Horrela, dauden hutsune eta beharrak identifikatu eta hiru urterako plan bat osatu nahi dute. Udalak AEKren Ahize hizkuntza aholkularitzako teknikarien laguntza izango du. Sei hilabete iraungo du prozesuaren lehen urratsak. Udala elkarlanean ariko da herriko enpresari txikiekin —horien lagin bat hartuta—, baita euskalgintzarekin ere. Urrira arte egongo dira horrela, eta orduan aurkeztuko dituzte lanketaren emaitzak. 3.000 langile baino gehiago Oiartzunen 50 langile baino gutxiago dituzten 500 enpresa baino gehiago daude. Guztira, 3.000 langile baino gehiago dira. Orain arte, udalak enpresa handiekin lan egin du euskararen normalizazioa bultzatzeko, baita ostalari eta merkatariekin ere. Hala ere, udalaren arabera “funtsezkoa” da enpresa txikiagoekin ere lan egitea. Lanin egitasmoa eurekin batera diseinatuko dute, “emango diren urratsak errealak izan daitezen”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.