[Argazki galeria] Ia ez existitzetik, ia-ia igotzera

Allerru Kirol Elkarteko nesken Kadete Mailako taldeak ez du igotzerik lortu, baina sasoi ahaztezina egin dute ia igotzera iritsiz. 13 jokalarirekin denboraldi guztiari eutsi diote.

Urko Etxebeste

Lezo

2016/05/16

Allerruko neskak, atzo, Intxaurdiren zelaian

Allerru Kirol Elkarteko nesken Kadeteen Mailako taldeak sasoi ahaztezina egin du. Gipuzkoako Lehen Mailan jokatu dute: ligan bigarren izan ziren Añorga boteretsuaren atzetik, eta igoerako fasean hirugarren izan dira; igotzeko aukera izatetik postu bakarrera gelditu dira. Atzo (igandea) jokatu zuten igoera faseko azken partida Intxaurdiren zelaian (Donostiako Cesar Benito zelaian): 2-4 irabazi zuten lezoarrek, baina ez zen nahikoa izan. Izan ere, irabazteaz gain, Urola taldearen porrota behar zuten mailaz igotzeko aukera izateko. Urolak 1-0 irabazi zion Amaikak Bat taldeari, fase horretan lehena izan denari. Baina arrakasta osoa izan da Allerruren kadeteena, Kadeteen Ohorezko Mailara ez igo arren. Izan ere, irailaren hasieran, ez zuten talderik. Hau da, ez zituzten jokalari adina taldea osatzeko. Baina hari, honi, hangoari deitu, konbentzitu, eta taldea eratzeko nahiko jokalari biltzea lortu zuten. Sasoi osoan, adibidez, 13 jokalarirekin jokatu dute Gipuzkoako zelaietan. Jakina da 11 jokalarik osatzen dituztela taldeak, hortaz, lehia bakoitzean bi aldaketa besterik ez egiteko aukera izan dute lezoarrek, beti norbait gaixo jarriko beldurrez. Hori, bere horretan, bada balentria, igo edo ez. Atzoko partidan galtzen hasi ziren Allerruko neskak, 1-0 galtzen joan ziren aldageletara berdeak. Baina bigarren zatian markagailua irauli, eta 1-4ekoan jarri zen markagailua, instant batean. Azkenean, etxekoek beste gol bat sartu, eta 2-4 azkenean. Egunotan Oarsoaldeko talde asko mailaz igo direla, edo koparen bat edo ligaren bat irabazi dutela ospatzen ari dira. Allerruko neska kadeteek tamaina horretako arrakasta entzutetsurik ez dute lortu. Baina isilean, egunez egun, entrenamenduz entrenamendu, eta partidaz partida, futbola bezalako kirol bati duintasuna eman diote, ilusioz, gogoz, kalitatez, lan eginez, eta talde lanean. Jarrai dezatela horrela jokalariek, eta bidelagun izan dituzten guraso, senide eta lagunek. Zorionak Irati, Eider, Maitane, Olaia, Maider, Enara Arrieta, Enara Arraras, Jone, Janire, Nagore, Nora, Sara eta Ane. Baita Angel eta Tato entrenatzaileei ere.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.